ಚೆನ್ನೈ: ಬಹುಭಾಷಾ ತಾರೆ ನಮಿತಾ ಭಾರತೀಯ ಜನತಾ ಪಾರ್ಟಿ (ಬಿಜೆಪಿ) ಸೇರಿದ್ದಾರೆ.
ಬಿಜೆಪಿಯ ಕಾರ್ಯಾಧ್ಯಕ್ಷ ಜೆ. ಪಿ. ನಡ್ಡಾ ಅವರ ಸಮ್ಮುಖದಲ್ಲಿ ನಮಿತಾ ಬಿಜೆಪಿಗೆ ಸೇರಿದ್ದಾರೆ.
ಎಐಎಡಿಎಂಕೆ ಸೇರಿದ ನಮಿತಾ ಕಳೆದೊಂದು ವರ್ಷದಿಂದ ಆ ಪಕ್ಷದಿಮದ ಅಂತರ ಕಾಯ್ದುಕೊಂಡಿದ್ದರು. ಇದೀಗ ಆ ಪಕ್ಷವನ್ನು ತೊರೆದು ಬಿಜೆಪಿ ಸೇರುವ ಮೂಲಕ ಸಕ್ರಿಯ ರಾಜಕಾರಣಿಯಾಗಲಿದ್ದೇನೆಎಂದು ನಮಿತಾ ಹೇಳಿದ್ದಾರೆ.
2002ರಲ್ಲಿ ತೆಲುಗಿನ‘ಸೊಂತಂ’ ಚಿತ್ರದ ಮೂಲಕ ಬೆಳ್ಳಿತೆರೆಗೆ ಬಂದ ನಮಿತಾ ನಂತರದ ದಿನಗಳಲ್ಲಿ ತಮಿಳು, ಕನ್ನಡ ಮತ್ತು ಮಲೆಯಾಳಂ ಚಿತ್ರಗಳಲ್ಲಿ ಮಿಂಚಿದ್ದರು.
ಕನ್ನಡದಲ್ಲಿ ‘ನೀಲಕಂಠ’, ‘ಹೂ’, ‘ನಮಿತಾ ಐ ಲವ್ ಯು’ ಚಿತ್ರಗಳ ಮೂಲಕ ತಮ್ಮಮಾದಕ ಮೈಮಾಟವನ್ನು ರಾಜ್ಯದ ಬೆಳ್ಳಿತೆರೆಗೂ ಪರಿಚಯಿಸಿದ್ದರು. ಕೆಲಸಮಯ ಬಣ್ಣದ ಜಗತ್ತಿನಿಂದ ದೂರವಿದ್ದ ನಮಿತಾ 2016ರಲ್ಲಿ ಮೋಹನ್ಲಾಲ್ ನಾಯಕರಾಗಿದ್ದ ‘ಪುಲಿಮುರುಗನ್’ ಚಿತ್ರದ ಮೂಲಕ ಮತ್ತೆ ಮಿಂಚುಹರಿಸಿದ್ದರು. ಕಮಲ್ ಹಾಸನ್ ನಡೆಸಿಕೊಡುವ ‘ಬಿಗ್ಬಾಸ್’ ತಮಿಳು ಆವೃತ್ತಿ ಅವರ ಜನಪ್ರಿಯತೆಯನ್ನು ಮತ್ತೊಮ್ಮೆ ಸಾಬೀತುಪಡಿಸಿತ್ತು.
ತಮಿಳುನಾಡಿನ ಕೊಯಮತ್ತೂರು ಸಮೀಪ ಅಭಿಮಾನಿಗಳು ನಮಿತಾ ಅವರಿಗೆ ದೇಗುಲವನ್ನೇ ಕಟ್ಟಿಸಿದ್ದಾರೆ. ಖುಷ್ಬು ಹೊರತುಪಡಿಸಿದರೆ, ಈ ಪರಿ ಅಭಿಮಾನಿಗಳ ಒಲವು ಗಳಿಸಿದ ನಟಿ ನಮಿತಾ ಒಬ್ಬರೇ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.