ಇಡಿ ವಿಚಾರಣೆಗೆ ರಿಯಾ ತಂದೆಯನ್ನು ಕರೆದೊಯ್ದ ಪೊಲೀಸರು

ಮುಂಬೈ:ನಟ ಸುಶಾಂತ್ ಸಿಂಗ್‌ ರಜಪೂತ್‌‌ ಆತ್ಮಹತ್ಯೆ ಪ್ರಕರಣದ ಸಂಬಂಧ, ಜಾರಿ ನಿರ್ದೇಶನಾಲಯದ (ಇ.ಡಿ) ವಿಚಾರಣೆಗೆಂದು ಮುಂಬೈ ಪೊಲೀಸರು ನಟಿ ರಿಯಾ ಚಕ್ರವರ್ತಿ ಅವರ ತಂದೆಯನ್ನು ಗುರುವಾರ ಕರೆದೊಯ್ದಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಪ್ರಕರಣದ ವಿಚಾರಣೆ ನಡೆಸಲು ಇಂದ್ರಜಿತ್‌ ಅವರನ್ನು ಕರೆದುಕೊಂಡು ಬರುವಂತೆ ಜಾರಿ ನಿರ್ದೇಶನಾಲಯಮುಂಬೈ ಪೊಲೀಸರಿಗೆ ಮನವಿ ಮಾಡಿತ್ತು.ಸಾಂತಾಕ್ರೂಜ್‌ ಪ್ರದೇಶದಲ್ಲಿರುವ ರಿಯಾ ಮನೆಗೆ ಮಧ್ಯಾಹ್ನ ಪೊಲೀಸರು ಬಂದಿದ್ದರು.

ಇಂದ್ರಜಿತ್‌ ಅವರನ್ನು ದಕ್ಷಿಣ ಮುಂಬೈನ ಇಡಿ ಕಚೇರಿಗೆ ಕರೆದೊಯ್ಯಲಾಗಿದೆಯೇ ಅಥವಾ ಬೇರೆ ಸ್ಥಳಕ್ಕೆ ಕರೆದುಕೊಂಡು ಹೋಗಲಾಗಿದೆಯೇ ಎಂಬ ಮಾಹಿತಿ ಲಭ್ಯವಾಗಿಲ್ಲ.ಸುಶಾಂತ್ ಸಿಂಗ್ ಆತ್ಮಹತ್ಯೆಗೆ ಪ್ರಚೋದನೆ ಮತ್ತು ಈ ಪ್ರಕರಣದಲ್ಲಿ ಅಕ್ರಮ ಹಣ ವರ್ಗಾವಣೆ ಮಾಡಿರುವ ಆರೋಪ ರಿಯಾ ಮತ್ತು ಅವರ ಕುಟುಂಬದ ಮೇಲಿದೆ.

ನನಗೆ ಮತ್ತು ನನ್ನ ಕುಟುಂಬದವರಿಗೆ ಜೀವ ಬೆದರಿಕೆ ಇದೆ. ಮುಂಬೈ ಪೊಲೀಸರು ನಮಗೆ ರಕ್ಷಣೆ ನೀಡಬೇಕು ಎಂದು ರಿಯಾ ಬುಧವಾರ ಮನವಿ ಮಾಡಿದ್ದರು.