ಮಹಿಳೆ ಕೇಳಿದ್ದಕ್ಕಿಂತ ಹೆಚ್ಚಿನ ಜೀವನಾಂಶಕ್ಕೆ ಕೋರ್ಟ್ ಆದೇಶಿಸಬಹುದು: ಒರಿಸ್ಸಾ HC

ಭುವನೇಶ್ವರ: ಪ್ರಕರಣದಲ್ಲಿನ ವಾಸ್ತಾವಾಂಶಗಳನ್ನು ಪರಿಗಣಿಸಿದ ನಂತರ, ಮಹಿಳೆಯು ಕೋರಿದ್ದ ಮೊತ್ತಕ್ಕಿಂತಲೂ ಹೆಚ್ಚಿನ ಜೀವನಾಂಶವನ್ನು ನೀಡುವಂತೆ ನ್ಯಾಯಾಲಯವು ಆದೇಶಿಸಬಹುದು ಎಂದು ಒರಿಸ್ಸಾ ಹೈಕೋರ್ಟ್‌ ಗುರುವಾರ ತೀರ್ಪು ನೀಡಿದೆ.

ಹಿಂದೂ ವಿವಾಹ ಕಾಯ್ದೆ–1955ರ ಅಡಿಯಲ್ಲಿ ಜೀವನಾಂಶದ ಮೊತ್ತವು ಮಹಿಳೆಯು ಅರ್ಜಿಯಲ್ಲಿ ಕೋರಿದ್ದಕ್ಕಿಂತಲೂ ಹೆಚ್ಚಾಗಬಹುದು ಎಂದು ನ್ಯಾಯಾಲಯ ಉಲ್ಲೇಖಿಸಿರುವುದಾಗಿ 'Live Law' ವರದಿ ಮಾಡಿದೆ.

ವಿಭಾಗೀಯ ಪೀಠವು ಪ್ರಕರಣವೊಂದರ ವಿಚಾರಣೆ ವೇಳೆ, 'ಕಡಿಮೆ ಜೀವನಾಂಶಕ್ಕೆ ಬೇಡಿಕೆ ಇಡಲಾಗಿದ್ದರೂ, ಅವಲಂಬಿತರ ನಿಜವಾದ ಅಗತ್ಯತೆಗಳು ಹಾಗೂ ಪಾವತಿದಾರರ ಆರ್ಥಿಕ ಪರಿಸ್ಥಿತಿಗಳನ್ನು ಪರಿಗಣಿಸಿ, ನ್ಯಾಯಯುತ ಮೊತ್ತವನ್ನು ಒದಗಿಸಲು ನ್ಯಾಯಾಂಗವು ವಿವೇಚನೆಯನ್ನು ಬಳಸಬೇಕು' ಎಂದಿದೆ.