ತನಿಖೆ: ದೌರ್ಜನ್ಯ ಆರೋಪ ಪರಿಗಣಿಸಲು ಸೂಚನೆ

ನವದೆಹಲಿ: ‘ತೆಲಂಗಾಣದ ಬಿಎಚ್‌ಇಎಲ್‌ ಸಂಸ್ಥೆಯಲ್ಲಿ ಹಣಕಾಸು ಅಧಿಕಾರಿಯಾಗಿದ್ದ ಮಹಿಳೆಯ ಸಾವಿನ ತನಿಖೆಯಲ್ಲಿ, ಆಕೆಯ ಮೇಲೆ ನಡೆದಿದೆ ಎನ್ನಲಾದ ‘ಲೈಂಗಿಕ ದೌರ್ಜನ್ಯದ’ ಆರೋಪವನ್ನೂ ಪರಿಗಣಿಸಬೇಕು’ ಎಂದು ಸುಪ್ರೀಂ ಕೋರ್ಟ್‌ ಶುಕ್ರವಾರ ತಲಂಗಾಣ ಪೊಲೀಸರಿಗೆ ಸೂಚಿಸಿದೆ.

2009ರಲ್ಲಿ ಸಂಸ್ಥೆಯನ್ನು ಸೇರಿದ್ದ ಮಹಿಳೆಯು, 2019ರ ಅ.17ರಂದು ಆತ್ಮಹತ್ಯೆ ಮಾಡಿಕೊಂಡಿದ್ದರು. ‘ಮಗಳು ಬರೆದಿಟ್ಟ ಪತ್ರದಲ್ಲಿ ಮತ್ತು ಕೊನೆಯ ಬಾರಿ ಸಹೋದರಿಯ ಜತೆ ನಡೆಸಿದ ಸಂಭಾಷಣೆಯಲ್ಲಿ ತಾನು ಮೇಲಧಿಕಾರಿಯಿಂದ ಲೈಂಗಿಕ ದೌರ್ಜನ್ಯ ಎದುರಿಸುತ್ತಿದ್ದುದು ಸ್ಪಷ್ಟವಾಗಿದೆ. ಸಂಸ್ಥೆಯಲ್ಲಿ ಆಕೆಗೆ ಮಾನಸಿಕ ಹಿಂಸೆಯನ್ನೂ ನೀಡಲಾಗುತ್ತಿತ್ತು’ ಎಂದು ಆಕೆಯ ತಾಯಿ ಆರೋಪಿಸಿದ್ದರು.

ಆದರೆ, ತೆಲಂಗಾಣ ಪೊಲೀಸರು ರಾಷ್ಟ್ರೀಯ ಮಹಿಳಾ ಆಯೋಗಕ್ಕೆ ಸಲ್ಲಿಸಿದ ವರದಿಯಲ್ಲಿ, ಆರೋಪಿ ಅಧಿಕಾರಿಗೆ ಕ್ಲೀನ್‌ಚಿಟ್‌ ನೀಡಿದ್ದರು ಎನ್ನಲಾಗಿದೆ.