ಕತಾರ್ ವಾಯು ಪ್ರದೇಶ ಬಂದ್: ವಿಮಾನ ಸಂಚಾರ ಅಸ್ತವ್ಯಸ್ತ

ಕೊಚ್ಚಿ: ಪಶ್ಚಿಮ ಏಷ್ಯಾದಲ್ಲಿ ಹೆಚ್ಚುತ್ತಿರುವ ಆತಂಕದಿಂದಾಗಿ ಕತಾರ್‌ನ ವಾಯುಪ್ರದೇಶ ಮುಚ್ಚಲಾಗಿದೆ. ಇದರಿಂದ ಸೋಮವಾರ ಮಧ್ಯರಾತ್ರಿ ಕೇರಳದ ಕೊಚಿನ್ ಅಂತರ ರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಹಲವು ವಿಮಾನಗಳು ವಿಳಂಬವಾದವು. ಕೆಲ ವಿಮಾನಗಳ ಸಂಚಾರ ರದ್ದು ಅಥವಾ ಮಾರ್ಗ ಬದಲಾವಣೆ ಮಾಡಲಾಯಿತು.

ಅಮೆರಿಕದ ಮೇಲೆ ಇರಾನ್‌ ಪ್ರತಿ ದಾಳಿಗೆ ಸಜ್ಜಾಗಿರುವ ಮಾಹಿತಿ ಹಿನ್ನೆಲೆಯಲ್ಲಿ ಕತಾರ್ ತನ್ನ ವಾಯುಪ್ರದೇಶ ಮುಚ್ಚಿದೆ.

ಸೋಮವಾರ ಸಂಜೆ 6.30ಕ್ಕೆ ದೋಹಾಕ್ಕೆ ಹೊರಟಿದ್ದ ಏರ್‌ಇಂಡಿಯಾ ಎಕ್ಸ್‌ಪ್ರೆಸ್‌ ವಿಮಾನವನ್ನು ಮಸ್ಕತ್‌ಗೆ ಕಡೆಗೆ ತಿರುಗಿಸಲಾಯಿತು. ಮಧ್ಯರಾತ್ರಿ 12.53ಕ್ಕೆ ನಿಗದಿಯಾಗಿದ್ದ ಏರ್‌ ಇಂಡಿಯಾದ ದೋಹಾ ವಿಮಾನ ಸಂಚಾರ ರದ್ದಾಯಿತು. ಅಬುದಾಬಿಗೆ ತೆರಳುತ್ತಿದ್ದ ಇತಿಹಾದ್‌ ವಿಮಾನ ವಾಪಸಾಯಿತು.

‘ಪರಿಸ್ಥಿತಿಯ ಮೇಲೆ ನಿಗಾ ಇಟ್ಟಿದ್ದೇವೆ. ಕತಾರ್‌ಗೆ ಯಾವುದೇ ವಿಮಾನ ಸಂಚರಿಸುತ್ತಿಲ್ಲ. ಕತಾರ್‌ನಲ್ಲಿ ಏರ್‌ ಇಂಡಿಯಾದ ಯಾವುದೇ ವಿಮಾನ ಇಳಿದಿಲ್ಲ’ ಎಂದು ಸಂಸ್ಥೆ ತಿಳಿಸಿದೆ.