ರೈಲುಗಳಲ್ಲಿ AC ಕೋಚುಗಳಿಗಿಂತ ಸಾಮಾನ್ಯ ಬೋಗಿ ಸೇರಿಸುವತ್ತ ಚಿತ್ತ: ಸಚಿವ ಅಶ್ವಿನಿ

ನವದೆಹಲಿ: ರೈಲುಗಳಲ್ಲಿ ಎಸಿ1, ಎಸಿ2 ಹಾಗೂ ಎಸಿ3ಗಿಂತ ಸಾಮಾನ್ಯ ಕೋಚ್‌ಗಳ ಸಂಖ್ಯೆಯನ್ನು ಹೆಚ್ಚಿಸಲು ರೈಲ್ವೆ ಇಲಾಖೆಯು ಹೆಚ್ಚಿನ ಒತ್ತು ನೀಡಿದೆ ಎಂದು ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್‌ ಬುಧವಾರ ತಿಳಿಸಿದರು. 

ಲೋಕಸಭೆಯಲ್ಲಿ ಪ್ರಶ್ನೆಯೊಂದಕ್ಕೆ ಉತ್ತರಿಸಿದ ಅವರು, ‘10,000 ಸಾಮಾನ್ಯ ಕೋಚ್‌ಗಳ ತಯಾರಿಕೆ ಶುರುವಾಗಿದೆ. ಡಿಸೆಂಬರ್ ಅಂತ್ಯದ ವೇಳೆಗೆ ಇವುಗಳ ಸೇರ್ಪಡೆಯಾಗಲಿದೆ’ ಎಂದು ತಿಳಿಸಿದರು. 

‘ಅಮೃತ್‌ ಭಾರತ್‌ ಸ್ಟೇಷನ್’ ಯೋಜನೆ ಅಡಿಯಲ್ಲಿ ದೇಶದಲ್ಲಿ 1,300 ರೈಲು ನಿಲ್ದಾಣಗಳನ್ನು ಮರುನಿರ್ಮಾಣಗೊಳಿಸಲಾಗುತ್ತಿದೆ. ಇದು ವಿಶ್ವದ ಅತಿ ದೊಡ್ಡ ಮರುಅಭಿವೃದ್ಧಿ ಯೋಜನೆಯಾಗಿದೆ. ಈ ಯೋಜನೆಯಡಿ ಹಲವು ನಿಲ್ದಾಣಗಳನ್ನು ₹700 ರಿಂದ ₹800 ಕೋಟಿ ವೆಚ್ಚದಲ್ಲಿ ಹಾಗೂ ಇತರ ನಿಲ್ದಾಣಗಳನ್ನು ₹100 ರಿಂದ ₹200 ಕೋಟಿ ವೆಚ್ಚದಲ್ಲಿ ಅಭಿವೃದ್ಧಿಗೊಳಿಸಲಾಗುವುದು’ ಎಂದು ಮಾಹಿತಿ ನೀಡಿದರು.