‘ಮಹಾಭಾರತ’ ಪೌರಾಣಿಕ ಧಾರಾವಾಹಿಯಲ್ಲಿ ಕರ್ಣನ ಪಾತ್ರ ಮಾಡಿದ್ದ ಪಂಕಜ್‌ ನಿಧನ

ಮುಂಬೈ: ಹಿಂದಿಯ ‘ಮಹಾಭಾರತ’ ಪೌರಾಣಿಕ ಧಾರಾವಾಹಿಯಲ್ಲಿ ಕರ್ಣನ ಪಾತ್ರ ನಿರ್ವಹಿಸಿದ್ದ, ಜನಪ್ರಿಯ ನಟ ಪಂಕಜ್‌ ಧೀರ್‌ (68) ಅವರು ಬುಧವಾರ ನಿಧನರಾದರು. 

ಅವರಿಗೆ ಪತ್ನಿ ಅನಿತಾ ಧೀರ್‌ ಹಾಗೂ ಪುತ್ರ ನಿಕಿತಿನ್‌ ಧೀರ್‌ ಇದ್ದಾರೆ.  

‘ಕ್ಯಾನ್ಸರ್‌ನಿಂದ ಬಳಲುತ್ತಿದ್ದ ಪಂಕಜ್‌ ಅವರು ಕಳೆದ ಹಲವು ತಿಂಗಳುಗಳಿಂದ ಚಿಕಿತ್ಸೆ ಪಡೆಯುತ್ತಿದ್ದರು’ ಎಂದು ಪಂಕಜ್‌ ಅವರ ಸ್ನೇಹಿತ ಹಾಗೂ ನಿರ್ಮಾಪಕರಾಗಿರುವ ಅಶೋಕ ಪಂಡಿತ್‌ ತಿಳಿಸಿದರು. 

ಪಂಜಾಬ್‌ ರಾಜ್ಯದವರಾದ ಪಂಕಜ್‌ ಅವರು 1980ರಲ್ಲಿ ಸಿನಿಮಾ ರಂಗಕ್ಕೆ ಕಾಲಿಟ್ಟರು. ಹಲವಾರು ಸಿನಿಮಾ ಹಾಗೂ ಧಾರಾವಾಹಿಗಳಲ್ಲಿ ಇವರು ನಟಿಸಿದ್ದಾರೆ. 1988ರಲ್ಲಿ ಕಿರುತೆರೆಯ ‘ಮಹಾಭಾರತ’ ಧಾರಾವಾಹಿಯಲ್ಲಿ ಕರ್ಣನ ಪಾತ್ರದ ಮೂಲಕ ಇವರು ಹೆಚ್ಚು ಜನಪ್ರಿಯರಾಗಿದ್ದರು.