ಮಿಲಿಟರಿ ಕ್ಯಾಂಟಿನ್‌ಗಳಲ್ಲಿ ಸ್ವದೇಶಿ ವಸ್ತು: ನಿರ್ಧಾರವಾಗಿಲ್ಲ ಎಂದ ಕೇಂದ್ರ

ನವದೆಹಲಿ: ಮಿಲಿಟರಿ ಕ್ಯಾಂಟಿನ್‌ಗಳಲ್ಲಿ ‘ಸ್ವದೇಶಿ’ ವಸ್ತುಗಳನ್ನಷ್ಟೇ ಮಾರಾಟ ಮಾಡಬೇಕು ಎನ್ನುವ ಕುರಿತು ಯಾವುದೇ ನಿರ್ಧಾರ ಕೈಗೊಳ್ಳಲಾಗಿಲ್ಲ ಎಂದು ರಕ್ಷಣಾ ಇಲಾಖೆ ಶನಿವಾರ ತಿಳಿಸಿದೆ.

ರಾಜ್ಯಸಭೆಯಲ್ಲಿ ಈ ಕುರಿತ ಪ್ರಶ್ನೆಗೆ ಪ್ರತಿಕ್ರಿಯೆ ನೀಡಿರುವ ರಕ್ಷಣಾ ಇಲಾಖೆ ರಾಜ್ಯ ಖಾತೆ ಸಚಿವ ಶ್ರೀಪಾದ್‌ ನಾಯ್ಕ್, ‘ಮಿಲಿಟರಿ ಕ್ಯಾಂಟೀನ್‌ಗಳಲ್ಲಿ 2017–18ರಲ್ಲಿ ₹17,190 ಕೋಟಿ, 2018–19ರಲ್ಲಿ ₹18,917 ಕೋಟಿ ಹಾಗೂ 2019–20ರಲ್ಲಿ 17,588 ಕೋಟಿ ವಹಿವಾಟು ನಡೆದಿದೆ. 2020–21ನೇ ಆರ್ಥಿಕ ವರ್ಷದಲ್ಲಿ ಆಗಸ್ಟ್‌ವರೆಗೆ ₹3,692 ಕೋಟಿ ವಹಿವಾಟು ನಡೆದಿದೆ. ಮಿಲಿಟರಿ ಕ್ಯಾಂಟಿನ್‌ಗಳಲ್ಲಿ ಕೇವಲ ಸ್ವದೇಶಿ ವಸ್ತುಗಳನ್ನೇ ಮಾರಾಟ ಮಾಡಬೇಕು ಎನ್ನುವ ಕುರಿತು ನಿರ್ಧಾರ ತೆಗೆದುಕೊಂಡಿಲ್ಲ’ ಎಂದು ಸ್ಪಷ್ಟಪಡಿಸಿದರು.

37 ಏರ್‌ಫೀಲ್ಡ್ಸ್‌ಗಳ ಆಧುನೀಕರಣ: 37 ಏರ್‌ಫೀಲ್ಡ್ಸ್‌ಗಳನ್ನು ಆಧುನೀಕರಣಗೊಳಿಸಲುಸರ್ಕಾರ, ಖಾಸಗಿ ಕಂಪನಿಗೆ ಗುತ್ತಿಗೆ ನೀಡಿದೆಯೇ ಎನ್ನುವ ಪ್ರತ್ಯೇಕ ಪ್ರಶ್ನೆಗೆ, ಶ್ರೀಪಾದ್‌ ನಾಯ್ಕ್‌‌ ಅಹುದೆನ್ನುವ ಉತ್ತರ ನೀಡಿದರು. ‘ಏರ್‌ಫೀಲ್ಡ್ಸ್‌ಗಳ ಮೂಲಸೌಕರ್ಯಗಳ ಆಧುನೀಕರಣದಿಂದಾಗಿ ಅವುಗಳ ಸಾಮರ್ಥ್ಯ ಹೆಚ್ಚಾಗಲಿದೆ. ರಾತ್ರಿಯ ವೇಳೆ ಕಾರ್ಯಾಚರಣೆ ಸೇರಿದಂತೆ ಯಾವುದೇ ಹವಾಮಾನದಲ್ಲೂ ಏರ್‌ಫೀಲ್ಡ್ಸ್‌ಗಳು ಸಮರ್ಪಕವಾಗಿ ಕಾರ್ಯನಿರ್ವಹಿಸಲಿವೆ’ ಎಂದರು.