ಪಾಕಿಸ್ತಾನದ ಜನರು ಸಂತೋಷದಿಂದಿಲ್ಲ: ಮೋಹನ್‌ ಭಾಗವತ್‌

ಭೋಪಾಲ್‌: ‘ಸ್ವಾತಂತ್ರ್ಯ ಲಭಿಸಿ ಏಳು ದಶಕಗಳು ಕಳೆದರೂ ಪಾಕಿಸ್ತಾನದ ಜನರು ಸಂತೋಷದಿಂದಿಲ್ಲ. ಭಾರತದ ವಿಭಜನೆಯು ಪ್ರಮಾದ ಎಂಬುದಾಗಿ ಅವರು ಈಗಲೂ ನಂಬಿದ್ದಾರೆ’ ಎಂದು ರಾಷ್ಟ್ರೀಯ ಸ್ವಯಂಸೇವಕ ಸಂಘದ (ಆರ್‌ಎಸ್ಎಸ್) ಸರಸಂಘಚಾಲಕ ಮೋಹನ್‌ ಭಾಗವತ್‌ ಶುಕ್ರವಾರ ಹೇಳಿದ್ದಾರೆ.

ಸ್ವಾತಂತ್ರ್ಯ ಹೋರಾಟಗಾರ ಹೇಮು ಕಲಾನಿ ಅವರ ಜನ್ಮ ವಾರ್ಷಿಕೋತ್ಸವದ ಅಂಗವಾಗಿ ಹಮ್ಮಿಕೊಂಡಿದ್ದ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ‘ಭಾರತವು ಪಾಕಿಸ್ತಾನದ ಮೇಲೆ ದಾಳಿ ನಡೆಸಬೇಕೆಂದು ನಾನು ಹೇಳುತ್ತಿಲ್ಲ. ಇತರರ ಮೇಲೆ ದಾಳಿಗೆ ಕರೆ ನೀಡುವ ಸಂಸ್ಕೃತಿಯನ್ನು ನಾವು ಹೊಂದಿಲ್ಲ’ ಎಂಬುದನ್ನು ಒತ್ತಿ ಹೇಳಿದರು.

‘ಆತ್ಮ ರಕ್ಷಣೆಗಾಗಿ ಸೂಕ್ತ ಪ್ರತ್ಯುತ್ತರ ನೀಡುವ ಸಂಸ್ಕೃತಿಯಿಂದ ನಾವು ಬಂದಿದ್ದೇವೆ’ ಎಂದು ಉಗ್ರರ ಶಿಬಿರಗಳ ಮೇಲೆ ನಡೆದಿದ್ದ ನಿರ್ದಿಷ್ಟ ದಾಳಿಯನ್ನು ಉಲ್ಲೇಖಿಸಿ ಹೇಳಿದರು.