ಪೊಲೀಸರಿಗೆ ಕರೆ ಮಾಡಿ ಪಿಎಂ ಮೋದಿಗೆ ಕೇಡು ಮಾಡುವುದಾಗಿ ಬೆದರಿಸಿದ್ದ ಮಹಿಳೆ ಬಂಧನ

ಮುಂಬೈ: ನಗರದ ಪೊಲೀಸರಿಗೆ ಕರೆ ಮಾಡಿ, ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಕೇಡು ಮಾಡುವುದಾಗಿ ಬೆದರಿಕೆ ಹಾಕಿದ್ದ ಮಹಿಳೆಯೊಬ್ಬರನ್ನು ಬಂಧಿಸಲಾಗಿದೆ ಎಂದು ಗುರುವಾರ ಅಧಿಕಾರಿಗಳು ತಿಳಿಸಿದ್ದಾರೆ.

ಆದರೆ, ಬಂಧಿತ 34 ವರ್ಷದ ಮಹಿಳೆಯು ಮಾನಸಿಕ ಸ್ಥಿಮಿತತೆ ಕಳೆದುಕೊಂಡಿದ್ದಾರೆ. ಅವರು, ನಗರದ ಪೊಲೀಸ್‌ ನಿಯಂತ್ರಣ ಕೊಠಡಿಗೆ ಬುಧವಾರ ಕರೆ ಮಾಡಿ ಬೆದರಿಕೆ ಒಡ್ಡಿದ್ದರು ಎಂದು ಹೇಳಿದ್ದಾರೆ.

ಮುಂಬೈನ ಪಶ್ಚಿಮ ಉಪನಗರ ಅಂಬೊಲಿಯಿಂದ ಕರೆ ಬಂದಿತ್ತು. ತಕ್ಷಣವೇ ಪ್ರಕರಣ ದಾಖಲಿಸಿಕೊಳ್ಳಲಾಗಿತ್ತು. ಕರೆಯ ಜಾಡು ಹಿಡಿದ ಪೊಲೀಸರ ತಂಡ, ಮಹಿಳೆಯನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದೆ ಎಂದು ಮಾಹಿತಿ ನೀಡಿದ್ದಾರೆ.

ಬಂಧಿತೆಯ ಮಾನಸಿಕ ಸ್ಥಿತಿ ಸ್ಥಿರವಾಗಿಲ್ಲ ಎಂಬುದು ವಿಚಾರಣೆ ಬಳಿಕ ಗೊತ್ತಾಗಿದೆ. ಕರೆಯನ್ನು 'ಪ್ರಾಂಕ್‌' (ಹುಚ್ಚಾಟ) ಎಂದು ಪರಿಗಣಿಸಿದ್ದೇವೆ. ಆಕೆ, ಯಾವುದೇ ಅಪರಾಧದ ಹಿನ್ನಲೆ ಹೊಂದಿಲ್ಲ. ಆದಾಗ್ಯೂ, ವಿವಿಧ ಆಯಾಮಗಳಿಂದ ತನಿಖೆ ಮುಂದುವರಿಸಿದ್ದೇವೆ ಎಂದೂ ವಿವರಿಸಿದ್ದಾರೆ.