ಕೆಂಪುಕೋಟೆ ಸ್ಫೋಟ: ಬಿಲಾಲ್‌ ಎನ್‌ಐಎ ಕಸ್ಟಡಿ ಅವಧಿ ವಿಸ್ತರಣೆ

ನವದೆಹಲಿ: ಕೆಂಪುಕೋಟೆ ಸಮೀಪ ಸಂಭವಿಸಿದ ಸ್ಫೋಟ ಪ್ರಕರಣದ ಆರೋಪಿ ಡಾ.ಬಿಲಾಲ್‌ ನಸೀರ್‌ ಮಲ್ಲಾ ಎನ್‌ಐಎ ಕಸ್ಟಡಿ ಅವಧಿಯನ್ನು ಏಳು ದಿನ ವಿಸ್ತರಿಸಿ ದೆಹಲಿಯ ನ್ಯಾಯಾಲಯವೊಂದು ಆದೇಶಿಸಿದೆ.

ಪ್ರಕರಣದ ದಾಳಿಕೋರ ಉಮರ್‌–ಉನ್‌–ನಬಿಗೆ ಆಶ್ರಯ ನೀಡಿದ್ದ ಆರೋಪಕ್ಕೆ ಸಂಬಂಧಿಸಿದಂತೆ ಸೋಯಬ್‌ನನ್ನು ಮತ್ತೆ ಐದು ದಿನ ಅಂದರೆ ಡಿಸೆಂಬರ್‌ 24ರವರೆಗೆ ನ್ಯಾಯಾಂಗ ವಶಕ್ಕೆ ಒಪ್ಪಿಸಿದೆ. 

ಸೋಯಬ್‌ ಮತ್ತು ಬಿಲಾಲ್‌ನನ್ನು ಪಟಿಯಾಲಾ ಹೌಸ್‌ ನ್ಯಾಯಾಲಯದ ಎದುರು ಶುಕ್ರವಾರ ಎನ್ಐಎ ಹಾಜರುಪಡಿಸಿತ್ತು. ವಿಚಾರಣೆ ವೇಳೆ ಮಾಧ್ಯಮ ಪ್ರತಿನಿಧಿಗಳಿಗೆ ಪ್ರವೇಶ ನಿರಾಕರಿಸಲಾಗಿತ್ತು.

ಬಿಲಾಲ್‌ನನ್ನು ಡಿಸೆಂಬರ್‌ 9ರಂದು ಬಂಧಿಸಿದ್ದು, ಪ್ರಕರಣದ ಪ್ರಮುಖ ಸಂಚುಕೋರ ಎಂದು ಎನ್‌ಐಎ ಹೇಳಿದೆ.