ಸತೀಶ ಜಾರಕಿಹೊಳಿ ‘ಹಿಂದೂ’ ಪದ ವಿವಾದ: ತನಿಖೆ ಮಾಡುವುದಕ್ಕೆ ಏನಿದೆ ಎಂದ ಬೊಮ್ಮಾಯಿ

ಬೆಳಗಾವಿ: ‘ಮಾತು ಆಡಿದರೆ ಹೋಯಿತು. ಮುತ್ತು ಒಡೆದರೆ ಹೋಯಿತು. ಹೀಗಿರುವಾಗ ಶಾಸಕ ಸತೀಶ ಜಾರಕಿಹೊಳಿ ಮಾತು ಆಡಿದ್ದಷ್ಟೇ ಅಲ್ಲ, ಅದನ್ನು ಸಮರ್ಥಿಸಿಕೊಳ್ಳುವ ಸಾಹಸ ಮಾಡಿದರು. ಈಗ ವಿಷಾದ ವ್ಯಕ್ತಪಡಿಸಿರುವುದು ಎಷ್ಟರಮಟ್ಟಿಗೆ ಸರಿ’ ಎಂದು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಪ್ರಶ್ನಿಸಿದರು.

‘ಹಿಂದೂ’ ಪದದ ಬಗ್ಗೆ ತಾವು ನೀಡಿದ್ದ ಹೇಳಿಕೆ ಹಿಂದಕ್ಕೆ ಪಡೆದಿರುವುದಾಗಿ ಸತೀಶ ಜಾರಕಿಹೊಳಿ ಬರೆದ ಪತ್ರದ ವಿಚಾರವಾಗಿ ಇಲ್ಲಿನ ಸಾಂಬ್ರಾ ವಿಮಾನ ನಿಲ್ದಾಣದಲ್ಲಿ ಅವರು ಪ್ರತಿಕ್ರಿಯಿಸಿದರು.

‘ಸತೀಶ ಅವರು ಶಬ್ದಕೋಶ ನೋಡಿ ಮಾತನಾಡಿದ್ದೇನೆ ಎನ್ನುತ್ತಾರೆ. ಆದರೆ, ಅದರ ಅರ್ಹತೆ ಏನು? ಈಗಾಗಲೇ ವಿಕಿಪೀಡಿಯಾ ಹಲವು ಬಾರಿ ತನಿಖೆಗೆ ಒಳಪಟ್ಟಿದೆ. ಆ ಸಂಸ್ಥೆಯ ಮುಖ್ಯಸ್ಥನ ಮೇಲೆ ಹಲವು ಪ್ರಕರಣಗಳಿವೆ’ ಎಂದ ಬೊಮ್ಮಾಯಿ, ‘ನನಗೆ ಅವರು ನೀಡಿರುವ ಪತ್ರದಲ್ಲಿ ಯಾವ ಅಂಶಗಳಿವೆ ಎಂಬುದನ್ನು ಪರಿಶೀಲಿಸುತ್ತೇನೆ. ತನಿಖೆ ಮಾಡುವುದಕ್ಕೆ ಏನಿದೆ’ ಎಂದು ಪ್ರಶ್ನಿಸಿದರು.

ಓದಿ... ‘ಹಿಂದೂ’ ಪದ ವಿವಾದ: ಯಾರಿಗಾದರೂ ನೋವಾಗಿದ್ದರೆ ವಿಷಾದಿಸುತ್ತೇನೆ -ಸತೀಶ ಜಾರಕಿಹೊಳಿ