ಲಾಕ್ಡೌನ್ ಬೆಳಗಾವಿ: ನವಜಾತ ಶಿಶು ಚಿಕಿತ್ಸೆಗಾಗಿ ವಿಮಾನ ಬಳಕೆ
ಬೆಳಗಾವಿ: ನವಜಾತ ಶಿಶುವೊಂದನ್ನು ಚಿಕಿತ್ಸೆಗೆ ಕರೆತರುವುದಕ್ಕಾಗಿ ಇಲ್ಲಿನ ಸಾಂಬ್ರಾ ವಿಮಾನನಿಲ್ದಾಣವನ್ನು ಲಾಕ್ಡೌನ್ ನಡುವೆಯೂ ಬಳಸಲಾಗಿದೆ.
ಸೂರತ್‌ನಿಂದ ಮಂಗಳವಾರ ಮಧ್ಯಾಹ್ನ ಇಲ್ಲಿಗೆ ಬಂದಿಳಿದಿದ್ದ ವಿಮಾನ (ಏರ್ ಆಂಬ್ಯುಲೆನ್ಸ್‌), ಬುಧವಾರ ಬೆಳಿಗ್ಗೆ ನಿರ್ಗಮಿಸಿದೆ. ಈ ವಿಮಾನದಲ್ಲಿ ಶಿಶುವಿನೊಂದಿಗೆ ವೈದ್ಯಕೀಯ ಸಿಬ್ಬಂದಿ ಬಂದಿದ್ದರು.
ಈ ಕುರಿತು ಪ್ರತಿಕ್ರಿಯಿಸಿದ ವಿಮಾನನಿಲ್ದಾಣ ನಿರ್ದೇಶಕ ರಾಜೇಶ್‌ಕುಮಾರ್ ಮೌರ್ಯ, ‘ಲಾಕ್ಡೌನ್ ಇದ್ದರೂ ವಿಮಾನನಿಲ್ದಾಣದಲ್ಲಿ ಕಾರ್ಗೊ, ಪರಿಹಾರ ಕಾರ್ಯಾಚರಣೆ ಹಾಗೂ ಇತರ ತುರ್ತು ಸೇವೆಗಳ ವಿಮಾನಗಳ ಹಾರಾಟಕ್ಕೆ ಅವಕಾಶವಿದೆ. ಬೆಳಿಗ್ಗೆ 9ರಿಂದ ಮಧ್ಯಾಹ್ನ 2ರವರೆಗೆ ಕನಿಷ್ಠ ಮಾನವ ಸಂಪನ್ಮೂಲ ಬಳಸಿಕೊಳ್ಳಲಾಗುತ್ತಿದೆ. ತುರ್ತು ಸಂದರ್ಭಗಳಲ್ಲಿ ಈ ಅವಧಿ ವಿಸ್ತರಿಸಿಕೊಳ್ಳಬಹುದಾಗಿದೆ. ಮಂಗಳವಾರ ಮಧ್ಯಾಹ್ನ 3ರ ನಂತರ ಬಂದಿದ್ದ ಏರ್ ಆಂಬ್ಯುಲೆನ್ಸ್‌ನಲ್ಲಿ ನವಜಾತ ಶಿಶು,ವೈದ್ಯರನ್ನು ಒಳಗೊಂಡ ತಂಡ ಚಿಕಿತ್ಸೆಗೆಂದು ತಂದಿತ್ತು. ಆ ವಿಮಾನಕ್ಕೆ ಡಿಜಿಸಿಎದಿಂದ ಅನುಮತಿಯೂ ದೊರೆತಿತ್ತು. ಬುಧವಾರ ಅದು ಮರಳಿದೆ. ನಾವು ಮಾನವೀಯತೆ ದೃಷ್ಟಿಯಿಂದಾಗಿ ಪೂರಕ ವ್ಯವಸ್ಥೆ ಮಾಡಿಕೊಟ್ಟಿದ್ದೇವೆ’ ಎಂದು ಮಾಹಿತಿ ನೀಡಿದರು.
ಆದರೆ, ಮಗುವಿಗಿದ್ದ ಆರೋಗ್ಯ ಸಮಸ್ಯೆ ಏನು ಮತ್ತು ಯಾವ ಆಸ್ಪತ್ರೆಗೆ ಕರೆತರಲಾಗಿತ್ತು ಎನ್ನುವುದು ತಿಳಿದುಬಂದಿಲ್ಲ. ವಿಮಾನನಿಲ್ದಾಣದ ಅಧಿಕಾರಿಗಳ ಬಳಿಯೂ ಆ ಮಾಹಿತಿ ಇಲ್ಲ.ವಿಮಾನದಲ್ಲಿ ಬಂದಿದ್ದವರು ಮುಂಜಾಗ್ರತಾ ಕ್ರವವಾಗಿ ‘ಪಿಪಿಇ’ ಸುರಕ್ಷಾ ಕವಚ ಧರಿಸಿದ್ದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.