ಧರ್ಮಸ್ಥಳ ಮಂಜುನಾಥನ ಸನ್ನಿಧಿಗೆ ಕೈ ಇಟ್ಟರೆ ಕಷ್ಟ: ವಿರೋಧ ಪಕ್ಷಗಳಿಂದ ಟೀಕಾಪ್ರಹಾರ

ಬೆಂಗಳೂರು: ‘ಧರ್ಮಸ್ಥಳದ ಬಾಹುಬಲಿ ಬೆಟ್ಟದ ಬುಡಕ್ಕೆ ಕೈಹಾಕಿದ್ದೀರಿ. ಮಂಜುನಾಥನ ಸನ್ನಿಧಿಗೆ ಕೈ ಹಾಕಿದರೆ ಸುಮ್ಮನಿರಲು ಸಾಧ್ಯವಿಲ್ಲ. ಆಗ ನಿಮ್ಮ ಬುಡವೇ ಅಲ್ಲಾಡುತ್ತದೆ’ ಎಂದು ಬಿಜೆಪಿಯ ವಿ.ಸುನಿಲ್‌ಕುಮಾರ್ ಆಕ್ರೋಶ ವ್ಯಕ್ತಪಡಿಸಿದರು.

ವಿಧಾನಸಭೆಯಲ್ಲಿ ನಿಯಮ 69ರಡಿ ಗುರುವಾರ ವಿಷಯ ಪ್ರಸ್ತಾಪಿಸಿದ ಅವರು, ‘ಅಭಿವ್ಯಕ್ತಿ ಸ್ವಾತಂತ್ರ್ಯದ ಹೆಸರಿನಲ್ಲಿ ಧಾರ್ಮಿಕ ನಂಬಿಕೆ ಹರಣ ನಡೆಯುತ್ತಿದೆ. ಇದಕ್ಕೆ ಸಂವಿಧಾನ ಮತ್ತು ಕಾನೂನಿನ ನೆರಳು ಪಡೆಯುತ್ತಿದ್ದಾರೆ. ಧರ್ಮಸ್ಥಳ, ಮಂಜುನಾಥಸ್ವಾಮಿ, ವೀರೇಂದ್ರ ಹೆಗ್ಗಡೆ ವಿರುದ್ಧ ಇಷ್ಟೊಂದು ಅಪಪ್ರಚಾರ ನಡೆಯುತ್ತಿರುವಾಗ ಅದನ್ನು ತಡೆಯಲು ಸರ್ಕಾರ ಮುಂದಾಗಿಲ್ಲ. ಸರ್ಕಾರವೇ ಈ ಗುಂಪುಗಳಿಗೆ ಒತ್ತಾಸೆಯಾಗಿ ನಿಂತಿದೆಯೋ ಎಂಬ ಅನುಮಾನ ಬರುತ್ತಿದೆ’ ಎಂದು  ಹೇಳಿದರು.

‘ಮುಸುಕುಧಾರಿ ವ್ಯಕ್ತಿ ಪೊಲೀಸ್‌ ಇಲಾಖೆಗೆ ಮಂಕುಬೂದಿ ಎರಚುತ್ತಿದ್ದಾನೆ. ಈತ ತನಗೆ ಬೇಕಾದ ಹಾಗೆ ಎಸ್‌ಐಟಿಯನ್ನು ಕುಣಿಸುತ್ತಿದ್ದಾನೆ. ಅಧಿಕಾರಿಗಳೂ ಆತನ ಮಾತು ಕೇಳುತ್ತಿದ್ದಾರೆ. ಈತ ಯಾರು, ಈತನ ಹಿಂದೆ ಯಾರಿದ್ದಾರೆ ಎಂಬುದು ಬಯಲಾಗಬೇಕು. ಸಾಮಾಜಿಕ ಜಾಲತಾಣಗಳಲ್ಲಿ ಧರ್ಮಸ್ಥಳ ಮತ್ತು ಹಿಂದುತ್ವದ ಕುರಿತ ಅವಹೇಳನಕಾರಿ ಮಾತುಗಳನ್ನು ಕೇಳಿದಾಗ ರಕ್ತ ಕುದಿಯುತ್ತದೆ. ಅಪ ಪ್ರಚಾರ ಮಾಡುತ್ತಿರುವವರ ಬಗ್ಗೆ ಏಕೆ ಎಫ್‌ಐಆರ್‌ ದಾಖಲಿಸಿಲ್ಲ’ ಎಂದು ಪ್ರಶ್ನಿಸಿದರು.

‘ನಮ್ಮ ಜಿಲ್ಲೆಯಲ್ಲಿ ಅಧಿಕಾರಿಯಾಗಿದ್ದ, ಈಗ ನೆರೆ ರಾಜ್ಯದಿಂದ ನಿಮ್ಮ ಪಕ್ಷದಿಂದ ಜನಪ್ರತಿನಿಧಿಯಾಗಿರುವ ವ್ಯಕ್ತಿ ಈ ಷಡ್ಯಂತ್ರದಲ್ಲಿದ್ದಾನೆ ಎಂಬ ವಿಚಾರ ಕೆಲ ಮಾಧ್ಯಮಗಳಲ್ಲಿ ವರದಿಯಾಗಿದೆ. ಧರ್ಮಸ್ಥಳಕ್ಕೂ ಎಸ್‌ಡಿಪಿಐಗೆ ಏನು ಸಂಬಂಧ? ಅವರೇಕೆ ಅಲ್ಲಿ ಪ್ರತಿಭಟನೆ ನಡೆಸಬೇಕು? ಹಲವು ವ್ಯಕ್ತಿಗಳಿಗೆ ವಿದೇಶಗಳಿಂದ ಹಣ ಬರುತ್ತಿದೆ? ವಿದೇಶಿ ಅಲ್‌ಜಝೀರಾ ಚಾನೆಲ್‌ಗೆ ಅಲ್ಲೇನು ಕೆಲಸ’ ಎಂದೂ ಸುನಿಲ್‌ಕುಮಾರ್‌ ಕೇಳಿದರು.

‘ತಿರುಪತಿ, ಶಬರಿಮಲೈ, ಶನಿಶಿಂಗ್ಣಾಪುರ, ತಿರುವನಂತಪುರ ದೇಗುಲಗಳ ನಂತರ ನಗರ ನಕ್ಸಲರು ಮತ್ತು ಎಡಚರ ಗ್ಯಾಂಗ್‌ ಧರ್ಮಸ್ಥಳಕ್ಕೆ ಕೈ ಹಾಕಿದೆ. ಬಾಹುಬಲಿ ಬೆಟ್ಟದ ಬುಡಕ್ಕೂ ಕೈಹಾಕಿದೆ. ಮಂಜುನಾಥನ ಸನ್ನಿಧಿಗೆ ಕೈ ಹಾಕಿದರೆ ಸುಮ್ಮನಿರಲು ಸಾಧ್ಯವಿಲ್ಲ. ಆಗ ನಿಮ್ಮ ಬುಡವೇ ಅಲ್ಲಾಡುತ್ತದೆ’ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

‘ಬಾಹ್ಯ ಶಕ್ತಿಗಳ ಒತ್ತಡಕ್ಕೆ ಮಣಿದು ಎಸ್‌ಐಟಿ ರಚಿಸಿದ್ದೀರಾ? ಇದರಲ್ಲಿ ನಿಮ್ಮ ಹೈಕಮಾಂಡ್‌ ನಿರ್ದೇಶನ ಇದೆಯೇ? ಇಂಡಿ ಒಕ್ಕೂಟದ ರಹಸ್ಯ ಕಾರ್ಯಸೂಚಿ ಏನಾದರೂ ಇದೆಯಾ’ ಎಂದು ಪ್ರಶ್ನಿಸಿದರು.

‘ನೂರಾರು ಶವ ಹೊತ್ತೊಯ್ಯಲು ವಿಕ್ರಮ ಬೇತಾಳನೇ?’

‘ತನಿಖೆಯಲ್ಲಿ ಶವಗಳು ಸಿಗದೇ ಇದ್ದಾಗ, ಕೊನೆಯಲ್ಲಿ ಆ ‘ಮಾಸ್ಕ್‌ ಮ್ಯಾನ್‌ ಹುಚ್ಚ’ ಎಂದು ಷರಾ ಬರೆಯುವುದಕ್ಕೂ ಮೊದಲೇ ಆತನನ್ನು ತನಿಖೆಗೆ ಒಳಪಡಿಸಬೇಕು’ ಎಂದು ವಿರೋಧ ಪಕ್ಷದ ನಾಯಕ ಆರ್‌.ಅಶೋಕ ಒತ್ತಾಯಿಸಿದರು.

‘ತನಿಖೆಗಾಗಿ ಹಿಟಾಚಿ, ಜೆಸಿಬಿ ಮತ್ತಿತರ ಆಧುನಿಕ ಸಾಧನಗಳನ್ನು ಬಳಸಲಾಗಿದೆ. ಆತನ ಭದ್ರತೆಗಾಗಿ ಮಷಿನ್‌ಗನ್‌ ಬಳಸುತ್ತಿದ್ದಾರೆ. ಹೀಗಾಗಿ ಮುಸುಕುಧಾರಿ ಯಾರೆಂಬುದು ಜನರಿಗೆ ತಿಳಿಸಬೇಕು’ ಎಂದು ಅವರು ಆಗ್ರಹಿಸಿದರು.

‘ಮುಸುಕುಧಾರಿ ವ್ಯಕ್ತಿಯ ಹೆಸರು ಚಿನ್ನಯ್ಯ, ಆತ ಕ್ರೈಸ್ತ ಧರ್ಮಕ್ಕೆ ಮತಾಂತರಗೊಂಡವನು ಎಂದು ಜನ ಹೇಳುತ್ತಿದ್ದಾರೆ. ಪೊಲೀಸರು ಪ್ರತಿದಿನ ಆತನಿಗೆ ಮೇಕಪ್‌ ಮಾಡಿ, ಬಿರಿಯಾನಿ ತಿನ್ನಿಸಿ, ಸಂಪೂರ್ಣ ಭದ್ರತೆ ನೀಡಿ ಕರೆದೊಯ್ಯುತ್ತಿದ್ದಾರೆ. ಆತ ಇವೆಲ್ಲವನ್ನೂ ಎಂಜಾಯ್‌ ಮಾಡುತ್ತಿದ್ದಾನೆ’ ಎಂದರು.

‘20 ಅಡಿ ಆಳದಲ್ಲಿ ಯಾರಾದರೂ ಹೆಣ ಹೂಳುತ್ತಾರಾ? ಒಬ್ಬ ವ್ಯಕ್ತಿ ಆರಡಿ ಅಗೆಯ ಬೇಕೆಂದರೂ ಬಹಳ ಕಷ್ಟ. ಆದರೆ, ಈ ವ್ಯಕ್ತಿ ಒಬ್ಬನೇ ಇಷ್ಟು ಕೆಲಸ ಮಾಡಿದ್ದಾನೆ ಎಂದರೆ, ಚಂದಾಮಾಮದಲ್ಲಿ ಬರುತ್ತಿದ್ದ ವಿಕ್ರಮ ಬೇತಾಳ ಕಥೆ ನೆನಪಿಗೆ ಬರುತ್ತದೆ. ಈತ ಒಬ್ಬನೇ ಕಾಡಿಗೆ ಹೆಣವನ್ನು ಹೊತ್ತುಕೊಂಡು ಹೋಗಿದ್ದಾನೆ ಎಂದರೆ ನಂಬಲು ಸಾಧ್ಯವಿಲ್ಲ. ಈಗ ಅಗೆದಿರುವ ಹೊಂಡಗಳನ್ನು ಕೃಷಿ ಹೊಂಡ ಮಾಡಿದರೆ ರೈತರಿಗೆ ಅನುಕೂಲವಾಗುತ್ತದೆ’ ಎಂದು ಅಶೋಕ ವ್ಯಂಗ್ಯವಾಡಿದರು.