‘ಸೂಟ್‌ಕೇಸ್‌ನಲ್ಲಿ ಇದ್ದುದು ಎಲೆಕ್ಟ್ರಾನಿಕ್ ಸಲಕರಣೆ, ಪಕ್ಷದ ಲಾಂಛನ’
ಬೆಂಗಳೂರು: ‘ಮೋದಿ ಅವರೊಂದಿಗೆ ಬಂದಿದ್ದ ಸೂಟ್‌ಕೇಸ್‌ನಲ್ಲಿ ಎಲೆಕ್ಟ್ರಾನಿಕ್ ಸಲಕರಣೆಗಳು, ಮೋದಿ ಭಾಷಣ ಮಾಡಲು ಬಳಸುವ ಡಯಾಸ್‌ನಲ್ಲಿ ಅಳವಡಿಸಲು ಬೇಕಾದ ಪಕ್ಷದ ಲಾಂಛನ ಇದ್ದವು’ಎಂದು ಚಿತ್ರದುರ್ಗ ಜಿಲ್ಲಾ ಬಿಜೆಪಿ ಘಟಕದ ಅಧ್ಯಕ್ಷ ಕೆ.ಎಸ್. ನವೀನ್ ಸ್ಪಷ್ಟಪಡಿಸಿದ್ದಾರೆ.
ಈ ಸೂಟ್‌ಕೇಸ್ ಅನ್ನು ವಿಶೇಷ ಭದ್ರತಾ ಘಟಕ (ಎಸ್‌ಪಿಜಿ) ಜತೆ ಕೊಂಡೊಯ್ಯಲಾಗುತ್ತದೆ. ಪ್ರಧಾನಿ ಪ್ರಯಾಣಿಸುವ ವೇಳೆ ಜೊತೆಗೆ ಮೂರು ಹೆಲಿಕಾಪ್ಟರ್‌ಗಳು ತೆರಳುತ್ತವೆ. ಅವುಗಳ ಪೈಕಿ ಒಂದರಲ್ಲಿ ಈ ಸೂಟ್‌ಕೇಸ್ ಮತ್ತು ನಾಲ್ವರು ಭದ್ರತಾ ಸಿಬ್ಬಂದಿ (ತಂತ್ರಜ್ಞರು) ಇರುತ್ತಾರೆ. ಮೋದಿ ವೇದಿಕೆ ತಲುಪುದಕ್ಕಿಂತ 10 ನಿಮಿಷ ಮೊದಲು ಈ ಪೆಟ್ಟಿಗೆಯನ್ನು ಅಲ್ಲಿಗೆ ತಲುಪಿಸಲಾಗುತ್ತದೆ.
ಪ್ರಧಾನಿ ಜೊತೆ ಇರುವ 13 ಬೆಂಗಾವಲು ವಾಹನಗಳಲ್ಲಿ ಇದನ್ನು ಕಳುಹಿಸಿದರೆ ತಲುಪುವುದು ವಿಳಂಬವಾಗುತ್ತದೆ. ಈ ಪೆಟ್ಟಿಗೆಯು ಪ್ರಧಾನ ಮಂತ್ರಿ ಸಚಿವಾಲಯದ ಎಸ್‌ಪಿಜಿ ಮತ್ತು ತಾಂತ್ರಿಕ ತಜ್ಞರ ತಂಡದ ಅಧೀನದಲ್ಲಿ ಇರುತ್ತದೆ ಎಂದು ನವೀನ್ ತಿಳಿಸಿದರು.
‘ಪಕ್ಷದ ಜಿಲ್ಲಾ ಘಟಕ 22 ವಾಹನಗಳನ್ನು ಬಾಡಿಗೆಗೆ ಪಡೆದಿದ್ದು, ಈ ಎಲ್ಲಾ ವಾಹನಗಳನ್ನು ಜಿಲ್ಲಾ ಪೊಲೀಸ್ ಅಧಿಕಾರಿಗಳು ಪರಿಶೀಲಿಸಿದ ಬಳಿಕ ಮೋದಿ ಸಮಾವೇಶಕ್ಕೆ ಬಳಸಲಾಗಿದೆ. ಕಟ್ಟುನಿಟ್ಟಿನ ಭದ್ರತಾ ವ್ಯವಸ್ಥೆ ಇರುವಾಗ ಪ್ರಧಾನ ಮಂತ್ರಿ ಬಂದಿಳಿದ ಸ್ಥಳಕ್ಕೆ ಖಾಸಗಿ ವಾಹನ ತರಲು ಹೇಗೆ ಸಾಧ್ಯ’ ಎಂದು ಅವರು ಪ್ರಶ್ನಿಸಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.