ಕಲಬುರ್ಗಿ: 44.1 ಡಿಗ್ರಿ ತಾಪಮಾನ

ಕಲಬುರ್ಗಿ: ನಗರದ ಗರಿಷ್ಠ ತಾಪಮಾನ ಶುಕ್ರವಾರ 44.1 ಡಿಗ್ರಿ ಸೆಲ್ಸಿಯಸ್‌ ತಲುಪಿತ್ತು.ಪ್ರಸಕ್ತ ವರ್ಷದಲ್ಲಿ ಈ ವರೆಗೆ ದಾಖಲಾದ ಅತಿ ಹೆಚ್ಚು ತಾಪಮಾನ ಇದಾಗಿದೆ.ಕಳೆದ ವರ್ಷ ಇದೇ ದಿನ 42 ಡಿಗ್ರಿ ಸೆಲ್ಸಿಯಸ್‌ ದಾಖಲಾಗಿತ್ತು.

ಬೆಳಿಗ್ಗೆ 11 ಗಂಟೆಯ ಹೊತ್ತಿಗೆ ಸೂರ್ಯರಶ್ಮಿಗಳು ಬಿಸಿ ಮುಟ್ಟಿಸುತ್ತಿದ್ದವು. ಮಧ್ಯಾಹ್ನ 1ರ ನಂತರ ತಾಪಮಾನ 44 ಡಿಗ್ರಿ ಸೆಲ್ಸಿಯಸ್‌ ದಾಟಿತು. ಪಾದಚಾರಿಗಳು, ದ್ವಿಚಕ್ರ ವಾಹನ ಸವಾರರು, ಬೀದಿಬದಿ ವ್ಯಾಪಾರಿಗಳಿಗೆ ಮೈಮೇಲೆ ಕೆಂಡ ಬಿದ್ದ ಅನುಭವ ಉಂಟಾಯಿತು. ಸೂರ್ಯನ ಆರ್ಭಟಕ್ಕೆ ಬೆದರಿದ ಜನ ಮನೆಯಿಂದ ಹೊರಗೆ ಬರಲಿಲ್ಲ.

ಗುರುವಾರ ಮಧ್ಯಾಹ್ನ ಗರಿಷ್ಠ 42 ಡಿಗ್ರಿ ಸೆಲ್ಸಿಯಸ್‌ ಇದ್ದ ತಾಪಮಾನ, ಶುಕ್ರವಾರ ಇದ್ದಕ್ಕಿದ್ದಂತೆ ಎರಡು ಡಿಗ್ರಿ ಜಿಗಿದಿದೆ. ಬೆಳಿಗ್ಗೆಯಿಂದಲೇ ಬೀಸುತ್ತಿದ್ದ ಬಿಸಿಗಾಳಿ, ಇಳಿಸಂಜೆಯವರೆಗೂ ಜನರನ್ನು ಹೈರಾಣ ಮಾಡಿತು. ಕನಿಷ್ಠ ತಾಪಮಾನದಲ್ಲೂ ಏರಿಕೆಯಾಗಿದ್ದು, 28 ಡಿಗ್ರಿ ದಾಖಲಾಗಿದೆ. ಮೇ ಮೊದಲ ವಾರದಲ್ಲಿ ಇನ್ನಷ್ಟು ಹೆಚ್ಚುವ ಸಾಧ್ಯತೆ ಇದೆ ಎಂದು ಭಾರತೀಯ ಹವಾಮಾನ ಇಲಾಖೆಯ ಬೆಂಗಳೂರು ಕೇಂದ್ರದ ಅಧಿಕಾರಿಗಳು ತಿಳಿಸಿದ್ದಾರೆ.

***

ತಾಪಮಾನ ಮುನ್ಸೂಚನೆ

ದಿನ ಗರಿಷ್ಠ ಕನಿಷ್ಠ

ಏ.27 42.8 27

ಏ.28 42 27

ಏ.29 43 27

ಏ.30 43 28