ಸ್ಮಾರ್ಟ್‌ ಮೀಟರ್ | ₹7000 ಕೋಟಿ ಹಗರಣ: ಅಶ್ವತ್ಥನಾರಾಯಣ

ಬೆಂಗಳೂರು: ಕೆಇಆರ್‌ಸಿ ಮತ್ತು ಕೆಟಿಪಿಪಿ ಕಾಯ್ದೆಯ ನಿಯಮಾವಳಿ ಉಲ್ಲಂಘಿಸಿ ವಿದ್ಯುತ್‌ ಸ್ಮಾರ್ಟ್‌ ಮೀಟರ್‌ಗಳ ಖರೀದಿ ಟೆಂಡರ್‌ನಲ್ಲಿ ಸುಮಾರು ₹7,000 ಕೋಟಿಯಷ್ಟು ಹಗರಣ ನಡೆದಿದ್ದು, ಗುತ್ತಿಗೆ ರದ್ದು ಮಾಡಿ ತನಿಖೆಗೆ ಸದನ ಸಮಿತಿ ರಚಿಸಬೇಕು ಎಂದು ಬಿಜೆಪಿಯ ಡಾ.ಸಿ.ಎನ್‌.ಅಶ್ವತ್ಥನಾರಾಯಣ ಆಗ್ರಹಿಸಿದರು.

ವಿಧಾನಸಭೆಯಲ್ಲಿ ಗುರುವಾರ ಬಜೆಟ್‌ ಮೇಲಿನ ಚರ್ಚೆಯಲ್ಲಿ ಭಾಗವಹಿಸಿ ಮಾತನಾಡಿದ ಅವರು ಈ ಸಂಬಂಧ ಅವರು ಗಂಭೀರ ಆರೋಪಗಳು ಮಾಡಿದರು. ಇದಕ್ಕೆ ಸಂಬಂಧಿಸಿದಂತೆ ಅವರು ಕೆಲವು ದಾಖಲೆಗಳನ್ನೂ ಪ್ರದರ್ಶಿಸಿ ಸಭ್ಯಾಧ್ಯಕ್ಷರ ಮೂಲಕ ಇಂಧನ ಸಚಿವ ಕೆ.ಜೆ.ಜಾರ್ಜ್ ಅವರಿಗೆ ಕಳುಹಿಸಿದರು.

ಈ ಆರೋಪ ನಿರಾಕರಿಸಿದ ಸಚಿವ ಜಾರ್ಜ್, ‘ನೀವು ಸುಳ್ಳು ಹೇಳುತ್ತಿದ್ದೀರಿ, ಸುಳ್ಳು ಹೇಳುವುದೇ ನಿಮ್ಮ ಕೆಲಸ. ನಾಳೆ ಮುಖ್ಯಮಂತ್ರಿಯವರು  ಉತ್ತರ ನೀಡುವುದಕ್ಕೂ ಮೊದಲು ನಿಮ್ಮ ಆರೋಪಗಳಿಗೆ ಉತ್ತರ ಕೊಡುತ್ತೇನೆ. ಈಗ ನೀವು ಮಾತನಾಡಿದ್ದು ನಾಳೆಯ ಪತ್ರಿಕೆಗಳಲ್ಲಿ ದೊಡ್ಡದಾಗಿ ಬರುತ್ತದೆ‘ ಎಂದು ಹರಿಹಾಯ್ದರು.

ಆರೋಪಗಳೇನು?

• ರಾಜ್ಯದಲ್ಲಿ 39 ಲಕ್ಷ ಸ್ಮಾರ್ಟ್‌ಗಳನ್ನು ಅಳವಡಿಸಲು ಮುಂದಾಗಿದ್ದಾರೆ. ವರ್ಷಕ್ಕೆ 9 ಲಕ್ಷ ಸ್ಮಾರ್ಟ್‌ ಮೀಟರ್‌ ಅಳವಡಿಕೆ ಗುರಿ ಇದೆ. ಸ್ಮಾರ್ಟ್‌ ಮೀಟರ್‌ ಅಳವಡಿಸುವುದು ಐಚ್ಛಿಕ, ಹೊಸ ಗ್ರಾಹಕರಿಗೆ ಕಡ್ಡಾಯ ಎಂದು ಕೆಇಆರ್‌ಸಿ ಮತ್ತು ಕೇಂದ್ರ ಇಂಧನ ಸಚಿವಾಲಯ ಹೇಳಿವೆ. ಆದರೆ ರಾಜ್ಯದಲ್ಲಿ ಎಲ್ಲರಿಗೂ ಕಡ್ಡಾಯವಾಗಿ ಅಳವಡಿಸಲು ಹೊರಟಿದ್ದಾರೆ.

• ಫೀಡರ್‌, ಟ್ರಾನ್ಸ್‌ಫಾರ್ಮರ್‌, ಮತ್ತು ಬೌಂಡರಿ ಮೀಟರ್‌ಗಳಿಗೆ ಸ್ಮಾರ್ಟ್‌ಮೀಟರ್‌ ಅಳವಡಿಸಬೇಕು. ಎಸ್ಕಾಂ ತನ್ನ ಸ್ವಂತ ಖರ್ಚಿನಲ್ಲಿ ಎಲ್ಲ ಮೀಟರ್‌ಗಳನ್ನು ಸ್ಮಾರ್ಟ್‌ ಮೀಟರ್‌ಗೆ ಬದಲಾಯಿಸಬೇಕು. ಆ ಬಳಿಕವೇ ಹೊಸ ಸಂಪರ್ಕ ಪಡೆಯುವವರಿಗೆ ಸ್ಮಾರ್ಟ್‌ ಮೀಟರ್‌  ಖರೀದಿಸಲು ಕಡ್ಡಾಯ ಮಾಡಬೇಕು. ಈ ಕೆಲಸಗಳು ಇನ್ನೂ ಆಗಿಲ್ಲ.

• ಇದರ ಗುತ್ತಿಗೆ ಪಡೆದ ಸಂಸ್ಥೆಗೆ ಒಂದು ವರ್ಷ ವಹಿವಾಟು ನಡೆಸಿದೆ. ವಿದ್ಯುತ್‌ ಕಂಬಗಳನ್ನು ಪೂರೈಕೆ ಮಾಡಿದ ಅರ್ಹತೆ. ಈ ಸಂಸ್ಥೆಗೆ ಸ್ಮಾರ್ಟ್‌ಮೀಟರ್‌ ಸಾಫ್ಟ್‌ವೇರ್‌ ಪೂರೈಕೆ ಮಾಡುವ ಕಂಪನಿಯನ್ನು ಉತ್ತರ ಪ್ರದೇಶ ಸರ್ಕಾರ ಕಪ್ಪು ಪಟ್ಟಿಗೆ ಸೇರಿಸಿತ್ತು.