ಸೌದಿ ದೊರೆಗೆ ಅಲ್‌ ಕೈದಾ ಎಚ್ಚರಿಕೆ

ದುಬೈ: ಸೌದಿ ಅರೇಬಿಯಾದ ಸುಧಾರಣಾವಾದಿ ದೊರೆ ಮೊಹಮ್ಮದ್‌ ಬಿನ್‌ ಸಲ್ಮಾನ್‌ ಅವರಿಗೆ ಅಲ್‌ ಕೈದಾ ಉಗ್ರರು ಎಚ್ಚರಿಕೆ ನೀಡಿದ್ದಾರೆ.

ಮಹಿಳೆಯರು ವಾಹನ ಚಲಾಯಿಸುವುದಕ್ಕೆ ಹಾಗೂ ಸಿನಿಮಾ ಪ್ರದರ್ಶನಗಳಿಗೆ ಹೇರಿದ್ದ ನಿರ್ಬಂಧಗಳನ್ನು ಮೊಹಮ್ಮದ್‌ ಹಿಂತೆಗೆದುಕೊಂಡಿದ್ದರು.

‘ದೊರೆಯ ಆಡಳಿತದಲ್ಲಿ ಮಸೀದಿಗಳನ್ನು ಸಿನಿಮಾ ಮಂದಿರಗಳನ್ನಾಗಿ ಪರಿವರ್ತಿಸಲಾಗಿದೆ. ಇಮಾಮ್‌ಗಳ ಪುಸ್ತಕಗಳನ್ನು ಬದಲಿಸಲಾಗಿದೆ’ ಎಂದು ಯೆಮೆನ್‌ ಮೂಲದ ಜಿಹಾದಿ ಗುಂಪಿನ ಉಗ್ರರು ಹೇಳಿರುವುದಾಗಿ ಮದಾದ್‌ ಪತ್ರಿಕೆ ವರದಿ ಮಾಡಿದೆ.

‘ಪೂರ್ವ ಮತ್ತು ಪಶ್ಚಿಮದ ಜಾತ್ಯತೀತರನ್ನು ಸೌದಿ ಅರೇಬಿಯಾ ಮುಕ್ತವಾಗಿ ಸ್ವಾಗತಿಸುತ್ತಿದೆ. ನೈತಿಕತೆ ಅವನತಿಯತ್ತ ಸಾಗುತ್ತಿದೆ’ ಎಂದೂ ಉಗ್ರರು ಹೇಳಿದ್ದಾರೆ.