US Tariff: ಭಾರತದ ಉತ್ಪನ್ನಗಳ ಮೇಲೆ ಶೇ 26ರಷ್ಟು ಪ್ರತಿ ಸುಂಕ ಹೇರಿದ ಟ್ರಂಪ್

ವಾಷಿಂಗ್ಟನ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಭಾರತದ ಉತ್ಪನ್ನಗಳ ಮೇಲೆ ಶೇ 26ರಷ್ಟು ಪ್ರತಿ ಸುಂಕ ಹೇರಿ ಬುಧವಾರ ಆದೇಶಿಸಿದ್ದಾರೆ.

ಈ ಪ್ರತಿ ಸುಂಕ ಏಪ್ರಿಲ್ 9ರಿಂದ ಅನ್ವಯವಾಗಲಿದೆ ಎಂದು ಶ್ವೇತಭವನ ತಿಳಿಸಿದೆ.

‘ಅವರು (ಭಾರತ) ನಮಗೆ ಶೇ 52ರಷ್ಟು ತೆರಿಗೆ ಹಾಕುತ್ತಿದ್ದಾರೆ. ಆದರೆ ನಾವು ಕಳೆದ ಹಲವು ದಶಕಗಳಿಂದ ಯಾವ ತೆರಿಗೆಯೂ ಹಾಕಿಲ್ಲ’ ಎಂದು ತೆರಿಗೆ ವಿಧಿಸುವ ಘೋಷಣೆ ವೇಳೆ ಟ್ರಂಪ್ ಹೇಳಿದ್ದಾರೆ.

ಈ ಸುಂಕ ಹೇರಿಕೆಯು ತೆರಿಗೆ ಹಾಗೂ ತೆರಿಗೆಯೇತರ ನಿರ್ಬಂಧಗಳ ಮೇಲೆಯೂ ಅನ್ವಯವಾಗಲಿದೆ ಎಂದು ಟ್ರಂಪ್ ಆಡಳಿತ ಹೇಳಿದೆ.

ಭಾರತವು ಅಮೆರಿಕದ ವಿರುದ್ಧ ಭಾರಿ ತೆರಿಗೆಯೇತರ ನಿರ್ಬಂಧಗಳನ್ನು ವಿಧಿಸಿದ್ದು, ಅದನ್ನು ರದ್ದು ಮಾಡಿದರೆ ಅಮೆರಿಕದ ರಫ್ತು ವಾರ್ಷಿಕವಾಗಿ $5.3 ಬಿಲಿಯನ್‌ನಷ್ಟು ಏರಿಕೆಯಾಗಲಿದೆ ಎಂದು ಶ್ವೇತಭವನದ ಪ್ರಕಟಣೆ ತಿಳಿಸಿದೆ.

ವ್ಯಾಪಾರ ಕೊರತೆ ಹಾಗೂ ಉತ್ಪನ್ನಗಳಿಗೆ ಪರಸ್ಪರ ವಿಧಿಸುವ ತೆರಿಗೆ ಸಮಾಧಾನಕರವಾಗಿರಲಿದೆ ಎಂದು ಟ್ರಂಪ್ ನಿರ್ಧರಿಸುವವರೆಗೆ ಈ ಸುಂಕಗಳು ಜಾರಿಯಲ್ಲಿರಲಿವೆ ಎಂದು ಪ್ರಕಟಣೆ ಹೇಳಿದೆ.

ಭಾರತದೊಂದಿಗೆ ಅಮೆರಿಕ $46 ಬಿಲಿಯನ್ ವ್ಯಾಪಾರ ಕೊರತೆ ಹೊಂದಿದೆ.