ಕೋವಿಡ್–19 ಸೋಂಕು: ಬಾಂಗ್ಲಾದೇಶ ರಕ್ಷಣಾ ಕಾರ್ಯದರ್ಶಿ ಸಾವು

ಢಾಕಾ:ಕೋವಿಡ್–19 ಸೋಂಕಿನಿಂದ ಬಳಲುತ್ತಿದ್ದ ಬಾಂಗ್ಲಾದೇಶದ ರಕ್ಷಣಾ ಕಾರ್ಯದರ್ಶಿ ಅಬ್ದುಲ್ಲಾ ಅಲ್‌ ಮೋಹ್ಸಿನ್‌ ಚೌಧರಿ ಅವರುಇಂದು ಬೆಳಿಗ್ಗೆಮೃತಪಟ್ಟಿದ್ದಾರೆ.

ಮೋಹ್ಸಿನ್‌ ಅವರು ಸೋಮವಾರ ಬೆಳಿಗ್ಗೆ 9.30ರ ಸುಮಾರಿಗೆ ಕೊನೆಯುಸಿರೆಳೆದರು ಎಂದು ಬಾಂಗ್ಲಾ ರಕ್ಷಣಾ ಸಚಿವಾಲಯದ ಆಡಳಿತಾಧಿಕಾರಿ ಎಂಡಿ ಭಾಸಾನಿ ಮಿರ್ಜಾ ಹೇಳಿರುವುದಾಗಿ ಢಾಕಾ ಟ್ರಿಬ್ಯೂನ್‌ ವರದಿ ಮಾಡಿದೆ. ಮೋಹ್ಸಿನ್‌ ಅವರಿಗೆ ಢಾಕಾದಲ್ಲಿರುವ ಮಿಲಿಟರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿತ್ತು.

ಮೋಹ್ಸಿನ್‌ ಅವರು ಮೇ 29 ರಂದು ಆಸ್ಪತ್ರೆಗೆ ದಾಖಲಾಗಿದ್ದರು. ಅವರಿಗೆ ಕೋವಿಡ್–19 ಸೋಂಕು ಇರುವುದು ಜೂನ್‌ 6ರಂದು ದೃಢಪಟ್ಟಿತ್ತು. ಆರೋಗ್ಯ ಸ್ಥಿತಿ ಹದಗೆಡಲಾರಂಭಿಸಿದ್ದರಿಂದ ಅವರನ್ನು ಜೂನ್‌ 18ರಂದು ಐಸಿಯುಗೆ ಸ್ಥಳಾಂತರಿಸಲಾಗಿತ್ತು. ಆದಾಗ್ಯೂ ಇಂದು ಬೆಳಿಗ್ಗೆಹೃದಯ ಸ್ತಂಭನದಿಂದ ಮೃತಪಟ್ಟಿದ್ದಾರೆ ಎಂದು ಭಾಸಾನಿ ತಿಳಿಸಿದ್ದಾರೆ.

ಬಾಂಗ್ಲಾದೇಶದಲ್ಲಿ ಇದುವರೆಗೆ 1.37 ಲಕ್ಷ ಕೊರೊನಾವೈರಸ್ ಪ್ರಕರಣಗಳು ವರದಿಯಾಗಿವೆ. ಒಟ್ಟು 1,738 ಸೋಂಕಿತರು ಮೃತಪಟ್ಟಿದ್ದಾರೆ.