ಅಫ್ಗನ್‌ನಿಂದ ನಾಗರಿಕರ ಸ್ಥಳಾಂತರಗೊಳಿಸುವ ಕಾರ್ಯಾಚರಣೆ ನಿಲ್ಲಿಸಿದ ಕೆನಡಾ

ಮಾಂಟ್ರಿಯಲ್: ಆಗಸ್ಟ್‌ 31ರ ಗಡುವಿನ ಅಂತ್ಯದವರೆಗೆ ತಮ್ಮ ನಾಗರಿಕರನ್ನು ಅಫ್ಗನ್‌ನಿಂದ ಸ್ಥಳಾಂತರ ಮಾಡಲು ವಿಶ್ವದ ಅನೇಕ ರಾಷ್ಟ್ರಗಳು ಪ್ರಯತ್ನ ನಡೆಸಿರುವ ಮಧ್ಯೆಯೇ ಕೆನಡಾ ತನ್ನ ಸ್ಥಳಾಂತರ ಕಾರ್ಯಚರಣೆಯನ್ನು ಅಂತ್ಯಗೊಳಿಸಿದೆ.

‘ಹಿಂದಿನ ದಿನವೇ ನಮ್ಮ ಸ್ಥಳಾಂತರ ಕಾರ್ಯಾಚರಣೆ ಸ್ಥಗಿತಗೊಂಡಿದೆ’ ಎಂದು ಕೆನಡಾದ ರಕ್ಷಣಾ ಸಚಿವಾಲಯದ ಪ್ರತಿನಿಧಿ ಲೆಫ್ಟಿನೆಂಟ್ ಜನರಲ್ ವೇಯ್ನ್ ಐರ್ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದರು.

‘ಹತಾಶೆಯಿಂದ ದೇಶದಿಂದ ಹೊರ ಹೋಗುತ್ತಿರುವವರನ್ನು ರಕ್ಷಿಸಲು ನಾವು ಹೆಚ್ಚು ಹೊತ್ತು ಇರಬೇಕೆಂದು ಬಯಸುತ್ತೇವೆ. ಆದರೆ, ಅದು ಸಾಧ್ಯವಿಲ್ಲ ಎಂಬುದೇ ಬೇಸರದ ಸಂಗತಿ. ಅಲ್ಲಿನ ಪರಿಸ್ಥಿತಿಗಳು ಅತ್ಯಂತ ವೇಗವಾಗಿ ಹದಗೆಡುತ್ತಿವೆ’ ಎಂದು ಅವರು ಹೇಳಿದರು.