ಭಾರತಕ್ಕೆ ಉತ್ತಮ ಗೆಳೆಯ ಬೇಕಾದರೆ ಟ್ರಂಪ್ ಅವರನ್ನು ಆಯ್ಕೆ ಮಾಡಿ: ಮನವಿ

ನ್ಯೂಯಾರ್ಕ್‌: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ’ಭಾರತದ ಉತ್ತಮ ಗೆಳೆಯ’ ಎಂದು ಬಣ್ಣಿಸಿದ ಭಾರತೀಯ ಅಮೆರಿಕನ್ನರ ಗುಂಪೊಂದು, ಈ ಬಾರಿಯ ಚುನಾವಣೆಯಲ್ಲಿ ಅವರನ್ನು ಮರು ಆಯ್ಕೆ ಮಾಡುವಂತೆ, ದೇಶದಾದ್ಯಂತ ನೆಲೆಸಿರುವ ಭಾರತೀಯ ಸಮುದಾಯದವರಲ್ಲಿ ಮನವಿ ಮಾಡಿದೆ.

’ಅಮೆರಿಕದ ಅಧ್ಯಕ್ಷೀಯ ಚುನಾವಣೆಯ ಇತಿಹಾಸದಲ್ಲಿ ಮೊದಲ ಬಾರಿಗೆ ಭಾರತೀಯ-ಅಮೆರಿಕನ್ ಸಮುದಾಯ ಚುನಾವಣೆಗೆ ಪರಿಗಣಿಸುವಷ್ಟು ಶಕ್ತಿಯಾಗಿ ಹೊರಹೊಮ್ಮಿದೆ’ ಎಂದು ಹೇಳಿದ ಟ್ರಂಪ್ ವಿಕ್ಟರಿ ಇಂಡಿಯನ್ ಅಮೆರಿಕನ್ ಹಣಕಾಸು ಸಮಿತಿಯ ಸಹ-ಅಧ್ಯಕ್ಷ ಅಲ್ ಮೇಸನ್ ಹೇಳಿದ್ದಾರೆ. ’ನಿಮ್ಮ ಬೆಂಬಲ ಅಧ್ಯಕ್ಷ ಟ್ರಂಪ್ ಅವರ ಗೆಲುವಿಗೆ ನೆರವಾಗುತ್ತದೆ’ ಎಂದು ಅವರು ಹೇಳಿದ್ದಾರೆ.

’ಇದು ಐತಿಹಾಸಿಕ ಚುನಾವಣೆ, ನಾವೆಲ್ಲರೂ ಸರಳವಾಗಿ ನಮ್ಮ ನಾಯಕರನ್ನು ಆಯ್ಕೆ ಮಾಡಬೇಕಾಗಿದೆ. ನಮಗೆ ಉತ್ತಮ ಆರ್ಥಿಕತೆ, ಕಡಿಮೆ ತೆರಿಗೆ ಮತ್ತು ಪುಟ್ಟದಾದ ಸರ್ಕಾರ ಬೇಕು. ಇವೆಲ್ಲದರ ಜತೆಗೆ, ಭಾರತದ ಜತೆಗೆ ಒಬ್ಬ ಉತ್ತಮ ಸ್ನೇಹಿತ ಬೇಕೆಂದು ಬಯಸುವುದಾದರೆ ಅಧ್ಯಕ್ಷ ಟ್ರಂಪ್ ಅವರನ್ನು ಮತ್ತೆ ಆಯ್ಕೆ ಮಾಡೋಣ’ ಎಂದು ಭಾರತದ ಖ್ಯಾತ ಉದ್ಯಮಿ ಚಿಂತು ಪಟೇಲ್ ಹೇಳಿದ್ದಾರೆ.