ಉತ್ತರ ಕೊರಿಯಾದ ಕ್ಷಿಪಣಿ ಬಳಿಸಿ ರಷ್ಯಾ ದಾಳಿ

ಕೀವ್‌, ಉಕ್ರೇನ್‌: ಉಕ್ರೇನ್‌ ಮೇಲೆ ದಾಳಿ ನಡೆಸಲು ರಷ್ಯಾ ಸೇನೆಯು ಉತ್ತರ ಕೊರಿಯಾದ ಕ್ಷಿಪಣಿಗಳನ್ನು ಬಳಸಿದೆ. ಈ ದಾಳಿಗಳಲ್ಲಿ ಉಕ್ರೇನ್‌ನ ಸುಮಾರು 24 ಮಂದಿ ಮೃತಪಟ್ಟು, 100ಕ್ಕೂ ಹೆಚ್ಚು ಮಂದಿ ಗಂಭೀರವಾಗಿ ಗಾಯಗೊಂಡಿದ್ದಾರೆ’ ಎಂದು ಉಕ್ರೇನ್‌ ಭದ್ರತಾ ಸೇವೆ (ಎಸ್‌ಬಿಯು) ಗುರುವಾರ ತಿಳಿಸಿದೆ.

ದಾಳಿ ನಡೆಸಲು ಬಳಸಿರುವ ಶಸ್ತ್ರಗಳು ‘ಹ್ವಾಸಾಂಗ್‌–11 ಖಂಡಾಂತರ ಕ್ಷಿಪಣಿ’ಗಳು ಎಂದು ತನಿಖೆಯಿಂದ ತಿಳಿದುಬಂದಿದೆ ಎಂದು ಎಸ್‌ಬಿಯು ಹೇಳಿದೆ. ಡಿಸೆಂಬರ್‌ ಅಂತ್ಯದಲ್ಲಿ ಉಕ್ರೇನ್‌ನ ದಕ್ಷಿಣ ಝಪೋರಿಝಝಿಯಾ ಪ್ರದೇಶದ ಮೇಲೆ ಮತ್ತು ಜನವರಿಯಲ್ಲಿ ರಾಜಧಾನಿ ಕೀವ್ ಮೇಲೆ ದಾಳಿ ನಡೆಸಲು ಈ ಕ್ಷಿಪಣಿಗಳನ್ನು ಬಳಸಲಾಗಿತ್ತು ಎಂದಿದೆ.

ಉತ್ತರ ಕೊರಿಯವು ರಷ್ಯಾಕ್ಕೆ ಖಂಡಾಂತರ ಕ್ಷಿಪಣಿಗಳು ಮತ್ತು ಉಡಾವಣಾ ವಾಹನಗಳನ್ನು ಕಳಿಸುತ್ತಿದೆ. ರಷ್ಯಾಕ್ಕೆ ಉತ್ತರ ಕೊರಿಯ ತನ್ನ ಬೆಂಬಲವನ್ನು ಹೆಚ್ಚಿಸಿರುವುದನ್ನು ಇದು ತೋರುತ್ತದೆ. ಇದು ಕಳವಳಕಾರಿ ಬೆಳವಣಿಗೆ ಎಂದು ಅಮೆರಿಕವು ಜನವರಿಯಲ್ಲಿ ಎಚ್ಚರಿಕೆ ನೀಡಿತ್ತು.