ಚಂಡಮಾರುತ: ಉತ್ತರ ಕೊರಿಯಾದಲ್ಲಿ ಸೇತುವೆ, ಮನೆಗಳಿಗೆ ಹಾನಿ

ಸಿಯೋಲ್‌: ಉತ್ತರ ಕೊರಿಯಾಕ್ಕೆ ಅಪ್ಪಳಿಸಿದ ಮೇಸಕ್ ಚಂಡಮಾರುತದಿಂದ ಸುಮಾರು 60 ಸೇತುವೆಗಳು ಕುಸಿದು ಬಿದ್ದಿದ್ದು, ಎರಡು ಸಾವಿರಕ್ಕೂ ಹೆಚ್ಚು ಮನೆಗಳು ಕೊಚ್ಚಿ ಹೋಗಿವೆ ಎಂದು ಅಲ್ಲಿನ ಮಾಧ್ಯಮಗಳು ಬುಧವಾರ ವರದಿ ಮಾಡಿವೆ.

ಚಂಡಮಾರುತದಿಂದ ಉಂಟಾದ ಹಾನಿಯಿಂದ ಈ ವರ್ಷದ ಪ್ರಮುಖ ಯೋಜನೆಗಳಿಗೆ ತೊಂದರೆಯಾಗಲಿದೆ ಎಂದು ಅಧ್ಯಕ್ಷ ಕಿಮ್‌ ಜಾಂಗ್‌ ಉನ್ ಹೇಳಿದ್ದಾರೆ.

ಕಳೆದ ಒಂದು ವಾರದಿಂದ ದೇಶದ ಪೂರ್ವ ಕರಾವಳಿಗೆ ಭಾರಿ ಮಳೆಯಾಗುತ್ತಿದೆ. 60 ಕಿ.ಮೀ ವ್ಯಾಪ್ತಿಯಲ್ಲಿ 60 ಸೇತುವೆಗಳು ಕುಸಿದಿವೆ. 3,500 ಮೀಟರ್‌ ರೈಲ್ವೆ ಹಳಿಗೆ ಹಾನಿಯಾಗಿದೆ ಎಂದು ಅಧಿಕೃತ ಕೆಸಿಎನ್‌ಎ ಸುದ್ದಿ ಸಂಸ್ಥೆ ತಿಳಿಸಿದೆ.

ಪ್ರವಾಹ ಪೀಡಿತ ಗ್ರಾಮೀಣ ಪ್ರದೇಶಗಳಲ್ಲಿ ಸಂಕಷ್ಟಕ್ಕೆ ಸಿಲುಕಿರುವವ ರಕ್ಷಣೆಗೆ ಧಾವಿಸುವಂತೆ ವಿಪತ್ತು ನಿರ್ವಹಣಾ ಪಡೆ ಹಾಗೂ ಪಕ್ಷದ ಕಾರ್ಯಕರ್ತರಿಗೆ ಕಿಮ್‌ ಕರೆ ನೀಡಿದ್ದಾರೆ.