ನೊಬೆಲ್ ಪ್ರಶಸ್ತಿ ಪುರಸ್ಕೃತ ಚೀನಾದ ಶತಾಯುಷಿ ಚೆನ್ ನಿಂಗ್ ಯಾಂಗ್ ನಿಧನ

ಬೀಜಿಂಗ್‌: ನೊಬೆಲ್‌ ಪುರಸ್ಕೃತ ಭೌತವಿಜ್ಞಾನಿ, ಶತಾಯುಷಿ ಚೆನ್ ನಿಂಗ್ ಯಾಂಗ್‌ (103) ಶನಿವಾರ ನಿಧನರಾಗಿದ್ದಾರೆ.

ಚೀನಾದ ಪೂರ್ವ ಭಾಗದಲ್ಲಿರುವ ಅನ್ಹುಯಿ ಪ್ರಾಂತ್ಯದ ಹೆಫೆಯಲ್ಲಿ 1922ರಲ್ಲಿ ಜನಿಸಿದ್ದ ಚೆನ್‌, 1940ರ ದಶಕದಲ್ಲಿ ಶೈಕ್ಷಣಿಕ ಅಧ್ಯಯನಕ್ಕಾಗಿ ಅಮೆರಿಕಕ್ಕೆ ಹೋಗಿದ್ದರು. 1957ರಲ್ಲಿ ಭೌತಶಾಸ್ತ್ರದಲ್ಲಿ ನೊಬೆಲ್‌ ಪುರಸ್ಕಾರ ಪಡೆದಿದ್ದರು ಎಂದು ಮಾಧ್ಯಮಗಳು ವರದಿ ಮಾಡಿವೆ.

‘ಇಪ್ಪತ್ತನೇ ಶತಮಾನದ ಶ್ರೇಷ್ಠ ಭೌತವಿಜ್ಞಾನಿಗಳಲ್ಲಿ ಯಾಂಗ್‌ ಒಬ್ಬರು’ ಎಂದು ಶಾಂಘೈ ಇನ್‌ಸ್ಟಿಟ್ಯೂಟ್‌ ಫಾರ್ ಅಡ್ವಾನ್ಸ್ಡ್‌ ಸ್ಟಡೀಸ್‌ನ ವಿಲ್ಜೆಕ್‌ ಕ್ವಾಂಟಮ್‌ ಸೆಂಟರ್‌ನ ಭೌತಶಾಸ್ತ್ರದ ಪ್ರಾಧ್ಯಾಪಕರು ಮತ್ತು ಸಹಾಯಕ ನಿರ್ದೇಶಕರಾದ ಶಿ ಯು ಹೇಳಿದ್ದಾರೆ.

‘ಯಾಂಗ್–ಮಿಲ್ಸ್‌ ಸಿದ್ಧಾಂತವಿಲ್ಲದೆ ಯಾವುದೇ ಪ್ರಮಾಣಿತ ಮಾದರಿ ಇರಲು ಸಾಧ್ಯವಿಲ್ಲ’ ಎಂದು ಅವರು ‘ದಿ ಪೋಸ್ಟ್‌’ಗೆ ತಿಳಿಸಿದ್ದಾರೆ.