ವಿಶ್ವದ ಒಂಟಿ ಆನೆ ಎಂದೇ ಖ್ಯಾತವಾದ ಕಾವನ್‌ ಕಾಂಬೋಡಿಯಾಗೆ ಸ್ಥಳಾಂತರ

ಇಸ್ಲಾಮಾಬಾದ್‌: ವಿಶ್ವದ ಒಂಟಿ ಆನೆ ಎಂದೇ ಕರೆಯಲಾಗುತ್ತಿದ್ದ ಕಾವನ್‌ ಎಂಬ ಆನೆಯನ್ನು ಪಾಕಿಸ್ತಾನದ ಮೃಗಾಲಯದಿಂದ ನ.29ರಂದು ಕಾಂಬೋಡಿಯಾಗೆ ಸ್ಥಳಾಂತರಿಸಲಾಗುತ್ತಿದ್ದು, ಈ ಪ್ರಯತ್ನದಲ್ಲಿ ಮುಂಚೂಣಿಯಲ್ಲಿದ್ದ ಅಮೆರಿಕದ ಗಾಯಕಿ ಷೆರ್‌ ಅವರಿಗೆ ಪಾಕಿಸ್ತಾನದ ಪ್ರಧಾನಿ ಇಮ್ರಾನ್‌ ಖಾನ್‌ ಅವರು ಅಭಿನಂದಿಸಿದ್ದಾರೆ.

ಕಾವನ್‌ ಇದ್ದ ಇಸ್ಲಾಮಾಬಾದ್‌ನ ಮೃಗಾಲಯದ ಸ್ಥಿತಿಯು ಹದಗೆಟ್ಟ ಸಂದರ್ಭದಲ್ಲಿ, 35 ವರ್ಷದ ಈ ಆನೆಯು ವಿಶ್ವದ ಗಮನ ಸೆಳೆದಿತ್ತು. 1985ರಲ್ಲಿ ಶ್ರೀಲಂಕಾದಲ್ಲಿ ಹುಟ್ಟಿದ್ದ ಈ ಆನೆಯನ್ನು, ಅಂದಿನ ಪಾಕಿಸ್ತಾನದ ರಾಷ್ಟ್ರಪತಿಗೆ ಶ್ರೀಲಂಕಾ ಸರ್ಕಾರವು ಕೊಡುಗೆಯಾಗಿ ನೀಡಿತ್ತು. 1990ರಲ್ಲಿ ಬಾಂಗ್ಲಾದೇಶದಿಂದ ಸಾಹ್ಲಿ ಎಂಬ ಆನೆಯನ್ನು ಕರೆತಂದು ಕಾವನ್‌ ಇದ್ದ ಮೃಗಾಲಯದಲ್ಲಿ ಸಾಕಲಾಗಿತ್ತು. 2012ರಲ್ಲಿ ಸಾಹ್ಲಿ ಮೃತಪಟ್ಟಿತ್ತು. ನಂತರದಲ್ಲಿ ಈ ಆನೆ ಒಂಟಿಯಾಗಿಯೇ ಇತ್ತು. ವನ್ಯಜೀವಿ ಹಕ್ಕುಗಳ ಹೋರಾಟಗಾರರು ಈ ಆನೆ ಹಾಗೂ ಮೃಗಾಲಯದಲ್ಲಿರುವ ಇತರೆ ಪ್ರಾಣಿಗಳನ್ನು ಬೇರೆ ಮೃಗಾಲಯಕ್ಕೆ ಸ್ಥಳಾಂತರಿಸುವ ಅಭಿಯಾನ ಮಾಡಿದ್ದರು.

ಮೇ 21ರಂದು ಇಸ್ಲಾಮಾಬಾದ್‌ ಹೈಕೋರ್ಟ್‌, ಕಾವನ್‌ ಸೇರಿದಂತೆ ಮೃಗಾಲಯದಲ್ಲಿರುವ ಎಲ್ಲ ಪ್ರಾಣಿಗಳ ಸ್ಥಳಾಂತರಕ್ಕೆ ಆದೇಶಿಸಿತ್ತು. ಕಳೆದ ಸೋಮವಾರ ಕಾವನ್‌ ಸ್ಥಳಾಂತರಕ್ಕೆ ಪಾಕಿಸ್ತಾನ ಸರ್ಕಾವು ಒಪ್ಪಿಗೆ ನೀಡಿದೆ.