ವೆಚ್ಚಕ್ಕೆ ಕಡಿವಾಣ: ಕೆಂಪು ರತ್ನಗಂಬಳಿ ಬಳಕೆ ನಿಷೇಧಿಸಿದ ಪಾಕ್

ಇಸ್ಲಾಮಾಬಾದ್‌: ಅನಗತ್ಯ ವೆಚ್ಚಗಳಿಗೆ ಕಡಿವಾಣ ಹಾಕುವ ಕ್ರಮವಾಗಿ ಅಧಿಕೃತ ಸರ್ಕಾರಿ ಕಾರ್ಯಕ್ರಮಗಳಲ್ಲಿ ಕೆಂಪು ರತ್ನಗಂಬಳಿಯನ್ನು ಬಳಸುವ ಪರಿಪಾಟಕ್ಕೆ ಪಾಕಿಸ್ತಾನದ ಪ್ರಧಾನಿ ಶೆಹಬಾಜ್ ಷರೀಫ್ ಅವರು ನಿಷೇಧ ಹೇರಿದ್ದಾರೆ.

ಸರ್ಕಾರದ ಸಂಪುಟ ವಿಭಾಗವು, ‘ಕೆಂಪು ರತ್ನಗಂಬಳಿಯನ್ನು ಇನ್ನು ರಾಜತಾಂತ್ರಿಕ ಸ್ವಾಗತ ಕಾರ್ಯಕ್ರಮಗಳಲ್ಲಷ್ಟೇ ಬಳಸಬಹುದು; ಸಚಿವರು, ಸರ್ಕಾರಿ ಅಧಿಕಾರಿಗಳಿಗೆ ಸ್ವಾಗತಕೋರಲು ಬಳಸುವಂತಿಲ್ಲ‘ ಎಂದು ಆದೇಶ ಹೊರಡಿಸಿದೆ.

ಪಾಕಿಸ್ತಾನ ಸದ್ಯ ತೀವ್ರ ಆರ್ಥಿಕ ಬಿಕ್ಕಟ್ಟಿನಿಂದ ಬಳಲುತ್ತಿದೆ. ಅನಗತ್ಯ ವೆಚ್ಚಕ್ಕೆ ಕಡಿವಾಣ ಹಾಕಿ, ಇದೇ ಸಂಪನ್ಮೂಲವನ್ನು ಅನಿವಾರ್ಯ ಉದ್ದೇಶಗಳಿಗೆ ಬಳಸುವುದು ಇದರ ಉದ್ದೇಶವಾಗಿದೆ ಎಂದು ‘ಎಕ್ಸ್‌ಪ್ರೆಸ್‌ ಟ್ರಿಬ್ಯೂನ್’ ವರದಿ ಮಾಡಿದೆ.