ಕಪೂರ್, ದಿಲೀಪ್‌ ಪೂರ್ವಿಕರ ಮನೆ ಖರೀದಿಗೆ ಮುಂದಾದ ಕೈಬರ್‌ ಸರ್ಕಾರ
ಪೇಶಾವರ: ಪಾಕಿಸ್ತಾನದ ಕೈಬರ್‌ ಪಕ್ತುಂಖ್ವಾ ಪ್ರಾಂತೀಯ ಸರ್ಕಾರವು ಭಾರತೀಯ ಸಿನಿಮಾ ದಿಗ್ಗಜರಾದ ರಾಜ್‌ ಕಪೂರ್ ಹಾಗೂ ದಿಲೀಪ್‌ ಕುಮಾರ್ ಅವರ ಪೂರ್ವಿಕರ ಮನೆಗಳನ್ನು ಖರೀದಿಸಲು ನಿರ್ಧರಿಸಿದೆ.
‘ಪೇಶಾವರ ನಗರದ ಹೃದಯ ಭಾಗದಲ್ಲಿರುವ ಈ ಎರಡೂ ಕಟ್ಟಡಗಳನ್ನು ರಾಷ್ಟ್ರೀಯ ಸ್ಮಾರಕಗಳೆಂದು ಘೋಷಿಸಲಾಗಿದೆ. ಇವುಗಳನ್ನು ಖರೀದಿಸಲು ಅಗತ್ಯವಿರುವ ಹಣ ಬಿಡುಗಡೆ ಮಾಡಲು ಕೈಬರ್‌ ಪ್ರಾಂತ್ಯದ ಪುರಾತತ್ವ ಇಲಾಖೆ ಮುಂದಾಗಿದೆ. ಈ ಸಂಬಂಧ ಪೇಶಾವರದ ಜಿಲ್ಲಾಧಿಕಾರಿಗೆ ಪತ್ರವನ್ನೂ ರವಾನಿಸಲಾಗಿದೆ’ ಎಂದು ಪುರಾತತ್ವ ಇಲಾಖೆಯ ಮುಖ್ಯಸ್ಥ ಡಾ.ಅಬ್ದುಸ್‌ ಸಮದ್‌ ಖಾನ್ ತಿಳಿಸಿದ್ದಾರೆ.
ಕಿಸ್ಸಾ ಖ್ವಾನಿ ಬಜಾರ್‌ನಲ್ಲಿರುವ ಕಪೂರ್ ಹವೇಲಿಯನ್ನು 1918 ರಿಂದ 1922ರ ಅವಧಿಯಲ್ಲಿ ದಿವಾನ್‌ ಬಸೇಶ್ವರನಾಥ್‌ ಕಪೂರ್ ಅವರು ನಿರ್ಮಿಸಿದ್ದರು. ಈ ಕಟ್ಟಡದಲ್ಲೇ ರಾಜ್‌ ಕಪೂರ್ ಮತ್ತು ಅವರ ಚಿಕ್ಕಪ್ಪ ತ್ರಿಲೋಕ್‌ ಕಪೂರ್ ಜನಿಸಿದ್ದರು. ಅಲ್ಲೇ ತಮ್ಮ ಬಾಲ್ಯದ ದಿನಗಳನ್ನು ಕಳೆದಿದ್ದರು. ದಿಲೀಪ್‌ ಅವರ ಪೂರ್ವಿಕರು ವಾಸವಿದ್ದ ಶತಮಾನದಷ್ಟು ಹಳೆಯದಾದ ಕಟ್ಟಡವು ಇದೇ ಭಾಗದಲ್ಲಿದೆ.
ಕಪೂರ್ ಹವೇಲಿಯ ಮಾಲೀಕತ್ವ ಹೊಂದಿರುವ ಅಲಿ ಕ್ವಾದರ್‌ ಅವರು ಈ ಕಟ್ಟಡವನ್ನು ಸರ್ಕಾರದ ಸುಪರ್ದಿಗೆ ನೀಡಲು ಒಪ್ಪಿದ್ದು, ಇದಕ್ಕಾಗಿ ₹200 ಕೋಟಿಯ ಬೇಡಿಕೆ ಇಟ್ಟಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.