ಅಫ್ಗಾನಿಸ್ತಾನದಲ್ಲಿ ಅಮೆರಿಕ ಸೋತಿದೆ, ಈ ಗೆಲುವು ನಮ್ಮೆಲ್ಲರದು: ತಾಲಿಬಾನ್

ಕಾಬೂಲ್: ಅಫ್ಗಾನಿಸ್ತಾನದಲ್ಲಿ ಅಮೆರಿಕವು ಸೋಲನುಭವಿಸಿದೆ. ಈ ಗೆಲುವು ನಮಗೆಲ್ಲರಿಗೂ ಸೇರಿದ್ದು ಎಂದು ತಾಲಿಬಾನ್ ವಕ್ತಾರ ಜಬಿಯುಲ್ಲಾ ಮುಜಾಹಿದ್ ಹೇಳಿದ್ದಾರೆ.

ಅಮೆರಿಕದ ಪಡೆಗಳು ಕಾಬೂಲ್‌ನಿಂದ ತೆರಳಿದ್ದು, ನಮಗೆ ಸ್ವಾತಂತ್ರ್ಯ ದೊರೆತಿದೆ. ಅಮೆರಿಕಕ್ಕೆ ತನ್ನ ಎಲ್ಲ ಉದ್ದೇಶವನ್ನು ಈಡೇರಿಸಿಕೊಳ್ಳುವುದು ಇಲ್ಲಿ ಸಾಧ್ಯವಾಗಲಿಲ್ಲ. ಅಮೆರಿಕವು ನಮ್ಮೊಂದಿಗೆ ಸೋಲನುಭವಿಸಿದೆ. ಆದಾಗ್ಯೂ, ಆ ದೇಶದೊಂದಿಗೆ ಉತ್ತಮ ಬಾಂಧವ್ಯ ಹೊಂದಲು ತಾಲಿಬಾನ್ ಬಯಸುತ್ತದೆ ಎಂದು ಮುಜಾಹಿದ್ ಹೇಳಿದ್ದಾರೆ.

ಓದಿ:ಅಮೆರಿಕ ಪಡೆಗಳು ತೆರಳಿದ ಬೆನ್ನಲ್ಲೇ ಸಂಪೂರ್ಣ ಸ್ವಾತಂತ್ರ್ಯ ಘೋಷಿಸಿಕೊಂಡ ತಾಲಿಬಾನ್

ಅಮೆರಿಕ ಪಡೆಗಳು ವಾಪಸಾದ ಬಳಿಕ ಕಾಬೂಲ್‌ ವಿಮಾನ ನಿಲ್ದಾಣದ ರನ್‌ವೇಯಲ್ಲಿ ನಡೆಯುವ ಮೂಲಕ ತಾಲಿಬಾನ್ ನಾಯಕರು ಸಾಂಕೇತಿಕವಾಗಿ ವಿಜಯೋತ್ಸವ ಆಚರಿಸಿದ್ದಾರೆ.

ಆಗಸ್ಟ್ 30ರ ಗಡುವು ಮುಗಿಯುತ್ತಿದ್ದಂತೆಯೇ, ಅಫ್ಗಾನಿಸ್ತಾನದಿಂದ ತೆರವು ಕಾರ್ಯಾಚರಣೆ ಮುಗಿದಿದೆ ಎಂದು ಅಮೆರಿಕ ಘೋಷಿಸಿತ್ತು. ಸೋಮವಾರ ಮಧ್ಯರಾತ್ರಿ ವೇಳೆಗೆ ಅಮೆರಿಕ ಯೋಧರನ್ನೊಳಗೊಂಡ ಕೊನೆಯ ವಿಮಾನ ಕಾಬೂಲ್‌ನಿಂದ ನಿರ್ಗಮಿಸಿತ್ತು.‌

ಓದಿ:ಕಾಬೂಲ್‌ ವಿಮಾನ ನಿಲ್ದಾಣ ತಾಲಿಬಾನ್‌ ನಿಯಂತ್ರಣಕ್ಕೆ