ಅಮೆರಿಕ: ಪಾಂಪಿಯೊಗೆ ಜಪಾನ್‌ ನೀಡಿದ್ದ ವಿಸ್ಕಿ ಬಾಟಲಿಗಳು ನಾಪತ್ತೆ, ತನಿಖೆ ಆರಂಭ
ವಾಷಿಂಗ್ಟನ್‌: ಅಮೆರಿಕದ ಮಾಜಿ ವಿದೇಶಾಂಗ ಕಾರ್ಯದರ್ಶಿ ಮೈಕ್‌ ಪಾಂಪಿಯೊ ಅವರಿಗೆ ಜಪಾನ್‌ ಉಡುಗೊರೆಯಾಗಿ ನೀಡಿದ್ದ ₹ 4.32 ಲಕ್ಷ ಮೌಲ್ಯದ (5,800 ಡಾಲರ್‌) ವಿಸ್ಕಿ ಬಾಟಲಿಗಳು ನಾಪತ್ತೆಯಾಗಿದ್ದು, ವಿದೇಶಾಂಗ ಇಲಾಖೆ ಈ ಬಗ್ಗೆ ತನಿಖೆ ಆರಂಭಿಸಿದೆ.
ದುಬಾರಿ ಬೆಲೆಯ ಮದ್ಯದ ಈ ಬಾಟಲಿಗಳು ಎಲ್ಲಿವೆ, ಯಾರು ತೆಗೆದುಕೊಂಡು ಹೋಗಿದ್ದಾರೆ ಎಂಬ ಬಗ್ಗೆ ಇಲಾಖೆ ತನಿಖೆ ಆರಂಭಿಸಿದೆ ಎಂದು ಮೂಲಗಳನ್ನು ಉಲ್ಲೇಖಿಸಿ ಸಿಎನ್‌ಎನ್‌ ಸುದ್ದಿಸಂಸ್ಥೆ ವರದಿ ಮಾಡಿದೆ.
2019ರಲ್ಲಿ ಪಾಂಪಿಯೊ ಅವರು ಜಪಾನ್‌ಗೆ ಭೇಟಿ ನೀಡಿದ್ದರು. ಆಗ ಈ ವಿಸ್ಕಿ ಬಾಟಲಿಗಳನ್ನು ಜಪಾನ್‌ ಸರ್ಕಾರ ಉಡುಗೊರೆಯಾಗಿ ನೀಡಿತ್ತು ಎಂದು ದಾಖಲೆಗಳು ಹೇಳುತ್ತವೆ.
ಈ ಕುರಿತು ಪ್ರತಿಕ್ರಿಯಿಸಿರುವ ಪಾಂಪಿಯೊ, ‘ನಾನು ವಿಸ್ಕಿ ಬಾಟಲಿಗಳನ್ನು ಸ್ವೀಕರಿಸಿಲ್ಲ. ಈ ಉಡುಗೊರೆಗಳು ನಾಪತ್ತೆಯಾಗಿವೆ ಅಥವಾ ಅವುಗಳು ಈಗ ಎಲ್ಲಿವೆ ಎಂಬ ಬಗ್ಗೆ ನನಗೆ ಗೊತ್ತಿಲ್ಲ’ ಎಂದು ಹೇಳಿದ್ದಾರೆ.
‘ವಿಸ್ಕಿ ಬಾಟಲಿಗಳ ಪತ್ತೆಗಾಗಿ ವಿದೇಶಾಂಗ ಇಲಾಖೆ ತನಿಖೆ ಆರಂಭಿಸುವಂಥ ವಿಚಿತ್ರ ತೀರ್ಮಾನ ಕೈಗೊಂಡಿದೆ. ಹಲವು ವಸ್ತುಗಳು ಕಳೆದ ಎರಡು ದಶಕಗಳ ಅವಧಿಯಲ್ಲಿ ನಾಪತ್ತೆಯಾಗಿವೆ. ಆಗಲೂ ಸಹ ತನಿಖೆಗಳು ನಡೆದಿವೆ. ಆದರೆ, ತನಿಖೆಯ ಫಲಿತಾಂಶ ಏನಾಯಿತು ಎಂಬುದು ಬಹಿರಂಗಗೊಂಡಿಲ್ಲ’ ಎಂದು ನ್ಯೂಯಾರ್ಕ್‌ ಟೈಮ್ಸ್‌ ವರದಿ ಮಾಡಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.