ಮಂಗಳವಾರ, 20-3-1962

ಮೊದಲಿಯಾರ್ ಸಮಿತಿ: ಶೀಘ್ರವೇ ನಿರ್ಧಾರ
ನವದೆಹಲಿ, ಮಾ. 19 - ವಾಸ್ತವ ಬಳಕೆದಾರರು ಮತ್ತು ವ್ಯವಸ್ಥಿತ ಆಮದುಗಾರರಿಗೆ ವರ್ಷಕ್ಕೊಮ್ಮೆ ಆಮದು ಲೈಸೆನ್ಸ್‌ಗಳನ್ನು ನೀಡುವುದು, ರಫ್ತು - ಸಹಕಾರಿ ಕೈಗಾರಿಕೆಗಳಿಗೆ ಅವಶ್ಯಕವಾದ ಹೆಚ್ಚುವರಿ ಕಚ್ಚಾ ಸಾಮಗ್ರಿಗಳಿಗಾಗಿ 25-30 ಕೋಟಿ ರೂಪಾಯಿಗಳ ಆವರ್ತ ನಿಧಿಯೊಂದನ್ನು ನಿರ್ಮಿಸುವುದು ಮತ್ತು ರಫ್ತು ಸ್ಥಿರೀಕರಣ ಮಂಡಲಿಯೊಂದರ ರಚನೆ ಇವು ರಾಮಸ್ವಾಮಿ ಮೊದಲಿಯಾರ್ ಸಮಿತಿ ಮಾಡಿರುವ ಪ್ರಮುಖ ಶಿಫಾರಸುಗಳಲ್ಲಿ ಕೆಲವು.

ಭಾರಿ ಅಣೆಕಟ್ಟೆಗೆ ಬದಲು ಅಡ್ಡ ಕಟ್ಟೆಗಳ ನಿರ್ಮಾಣ
ಮಡಿಕೇರಿ, ಮಾ. 19 - ಕೊಡಗು ಜಿಲ್ಲೆಯಲ್ಲಿ ಹಾರಂಗಿ ಹಾಗೂ ಕಂಬದಕಡ ಅಣೆಕಟ್ಟುಗಳ ನಿರ್ಮಾಣ ಯೋಜನೆ ಮತ್ತು ಹಾಸನ ಜಿಲ್ಲೆಯಲ್ಲಿ ಹೇಮಾವತಿ ಅಣೆಕಟ್ಟು ಯೋಜನೆಗಳ ಬಗ್ಗೆ ರಾಜ್ಯದ ಹೊಸ ಸರ್ಕಾರವು ಈಗಾಗಲೇ ಪುನರ್ ಪರಿಶೀಲಿಸಿ, ಹಿಂದಿನ ಸರ್ಕಾರದ ನಿರ್ಧಾರಕ್ಕೆ ಪ್ರತಿಯಾಗಿ ಪ್ರಮುಖ ನಿರ್ಧಾರವೊಂದನ್ನು ಕೈಗೊಂಡಿದೆ.