ಪ್ರಜಾವಾಣಿಯಲ್ಲಿ 50 ವರ್ಷಗಳ ಹಿಂದೆ: ಬುಧವಾರ, 3–1–2023

ಸಂಪೂರ್ಣ ಆಂಧ್ರ ಬಂದ್‌, 3 ಸ್ಥಳಗಳಲ್ಲಿ ಐದು ಬಾರಿ ಗೋಲಿಬಾರ್‌: 3 ಸಾವು

ಹೈದರಾಬಾದ್‌, ಜ. 2– ಪ್ರತ್ಯೇಕ ಆಂಧ್ರ ಚಳವಳಿಗಾರರ ಉದ್ರಿಕ್ತ ಗುಂಪನ್ನು ಚದುರಿ ಸಲು 3 ಊರುಗಳಲ್ಲಿ– ನೆಲ್ಲೂರು, ಅನಂತಪುರ ಮತ್ತು ಮಚಲಿಪಟ್ಟಣ ಸಮೀಪದ ನಗಯಲಂಕಗಳಲ್ಲಿ ಐದು ಬಾರಿ ಪೊಲೀಸರು ಗುಂಡು ಹಾರಿಸಿದಾಗ ಮೂವರು ಮೃತಪಟ್ಟು, ಹಲವರು ಗಾಯಗೊಂಡರು. ಆಂಧ್ರ ವಲಯದ 12 ಜಿಲ್ಲೆಗಳಲ್ಲೂ ಇಂದು ಸಂಪೂರ್ಣ ಬಂದ್‌ ಆಚರಿಸಲಾಯಿತು.

ನೆಲ್ಲೂರಿನಲ್ಲಿ ಒಬ್ಬ, ಅನಂತಪುರ
ದಲ್ಲಿ ಇಬ್ಬರು ಗುಂಡಿಗೆ ಬಲಿಯಾದರೆಂದು ವರದಿ. ಈ ಎರಡು ಸ್ಥಳಗಳಲ್ಲಿ ಪೊಲೀಸರು ಎರಡೆರಡು ಬಾರಿ ಗುಂಡು ಹಾರಿಸಿದ್ದರು.

ಭೂಸನೂರು ಮಠ ಅವರಿಗೆ
ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ

ನವದೆಹಲಿ, ಜ. 2– ಎಸ್‌.ಎಸ್‌.ಭೂಸನೂರು ಮಠ ಅವರ ‘ಶೂನ್ಯ ಸಂಪಾದನೆಯ ಪರಾಮರ್ಶೆ’ ವಿಮರ್ಶಾ ಕೃತಿಗೆ 1972ರ ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ನೀಡಲಾಗಿದೆ. 1972ರ ಡಿಸೆಂಬರ್‌ 30ರಂದು ಬೆಂಗಳೂರಿನಲ್ಲಿ ಅಕಾಡೆಮಿಯ ಅಧ್ಯಕ್ಷ ಡಾ.ಸುನೀತಿ ಕುಮಾರ್‌ ಚಟರ್ಜಿ ಅವರ ನಾಯಕತ್ವದಲ್ಲಿ ಸಭೆ ಸೇರಿದ್ದ ಅಕಾಡೆಮಿಯ ಕಾರ್ಯನಿರ್ವಾಹಕ ಮಂಡಲಿಯು 1972ರ ಪ್ರಶಸ್ತಿಗಾಗಿ 13 ಸಾಹಿತ್ಯ ಕೃತಿಗಳನ್ನು ಆಯ್ಕೆ ಮಾಡಿತು.