ವಾಚಕರ ವಾಣಿ: ಜನಪ್ರತಿನಿಧಿಗಳಿಗೆ ಹೊಳೆಯಲಿಲ್ಲವೇಕೆ?

ವಿವಿಧ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿರುವವರಿಗೆ ರಾಜ್ಯ ಸರ್ಕಾರ ಇತ್ತೀಚೆಗೆ ರಾಜ್ಯೋತ್ಸವ ಪ್ರಶಸ್ತಿ ನೀಡಿ ಗೌರವಿಸಿತು. ಮಾರನೇ ದಿನ ಪತ್ರಿಕೆಗಳಲ್ಲಿ ಪ್ರಕಟವಾದ ಫೋಟೊ ನೋಡಿದ ನನಗೆ ಬೇಜಾರಾಯಿತು. ಪ್ರಶಸ್ತಿ ಪಡೆದಿದ್ದವರೆಲ್ಲಾ ವಯಸ್ಸಿನಲ್ಲಿ ದೊಡ್ಡವರಾಗಿದ್ದರು. ಅವರನ್ನು ನಿಲ್ಲಿಸಿ, ಸರ್ಕಾರವನ್ನು ಪ್ರತಿನಿಧಿಸುವವರು ಮುಂದಿನ ಸಾಲಿನಲ್ಲಿ ಕುಳಿತುಕೊಂಡಿದ್ದರು. ಇದು ಎಷ್ಟು ಸರಿ?

ನಮ್ಮ ಮನೆಗಳಲ್ಲಿ ಗ್ರೂಪ್‌ ಫೋಟೊ ತೆಗೆಸಿಕೊಳ್ಳುವಾಗ ಹಿರಿಯರನ್ನು ಕೂರಿಸಿ ಚಿಕ್ಕವರಾದ ನಾವು ಅವರ ಹಿಂದೆ ನಿಲ್ಲುತ್ತೇವೆ. ಮುಖ್ಯಮಂತ್ರಿಗಳು ಹಿರಿಯರು, ಪರವಾಗಿಲ್ಲ. ಉಳಿದ ಜನಪ್ರತಿನಿಧಿಗಳಿಗೆ ಇದು ಏಕೆ ಹೊಳೆಯಲಿಲ್ಲ? ಹಿರಿಯರಿಗೆ ಗೌರವ ಕೊಡುವುದು ಹೀಗೇ ಏನು?

–ಅನ್ವಯ್, ಬೆಂಗಳೂರು