ಶಾಲೆಯಲ್ಲಿ ಬಿಸಿಯೂಟ ಅಡುಗೆ ಸಿಬ್ಬಂದಿಯ ಅಳಲು ಆಲಿಸಿ

ಶಾಲೆಯಲ್ಲಿ ಬಿಸಿಯೂಟ ತಯಾರಿಸುವ ಅಡುಗೆ ಸಿಬ್ಬಂದಿ, ಅರೆಮನಸ್ಸಿನಿಂದ ಕೆಲಸಕ್ಕೆ ಬರುತ್ತಿದ್ದಾರೆ. ಬೆಳಿಗ್ಗೆ 9.30ಕ್ಕೆ ಹಾಲು ಕಾಯಿಸಲು ಬರಬೇಕೆಂದು ಹೇಳಿದರೆ ‘ನಮಗೆ ಕೊಡುವ ಸಂಬಳ ಏನೇನೂ ಅಲ್ಲ’ ಎನ್ನುತ್ತಾರೆ. ಅವರಿಗೆ ತಿಂಗಳಿಗೆ ಸಿಗುತ್ತಿರುವುದು 2,700 ರೂಪಾಯಿ. ‘ನಾವು ಹೊರಗಡೆ ಕೆಲಸಕ್ಕೆ ಹೋದರೆ ತಿಂಗಳಿಗೆ 8 ಸಾವಿರದಿಂದ 10 ಸಾವಿರ ರೂಪಾಯಿವರೆಗೂ ಸಂಪಾದಿಸುತ್ತೇವೆ. ಬೇಡವಾದರೆ ಈಗಲೇ ಕಳುಹಿಸಿಬಿಡಿ’ ಎನ್ನುತ್ತಾರೆ. ‘ನಾವು ಇಲ್ಲಿ ಅಡುಗೆ ಮಾಡಿ, ಮಕ್ಕಳಿಗೆ ಬಡಿಸಿ, ಎಲ್ಲವನ್ನೂ ತೊಳೆದು ಹೋಗುವಷ್ಟರಲ್ಲಿ ಮಧ್ಯಾಹ್ನ 3 ಗಂಟೆಯಾಗುತ್ತದೆ. ಆ ಬಳಿಕ ಬೇರೆ ಎಲ್ಲಿಗಾದರೂ ಕೂಲಿಗೆ ಹೋಗೋಣ ಎಂದರೆ ಆಗ ನಮ್ಮನ್ನು ಯಾರು ಕರೆಯುತ್ತಾರೆ? ಈ ಸಂಬಳವನ್ನೇ ನಂಬಿಕೊಂಡು ಜೀವನ ಮಾಡುವುದು ಹೇಗೆ? ನಮಗೂ ಗಂಡ–ಮಕ್ಕಳು ಇಲ್ಲವೇ? ಸಂಬಳವನ್ನಾದರೂ ಹೆಚ್ಚಿಸಿದರೆ ಹೇಗೋ ನಿಭಾಯಿಸಬಹುದು’ ಎನ್ನುತ್ತಾರೆ.ಇವರ ಅಳಲನ್ನು ಸರ್ಕಾರ ಗಮನಿಸಲಿ.

–ಸಾ.ಮ. ಶಿವಮಲ್ಲಯ್ಯ, ಸಾಸಲಾಪುರ, ಕನಕಪುರ