ಕಾಯಕ ಕಿರಣ ಯೋಜನೆಯಡಿ ಸ್ವ ಉದ್ಯಮಕ್ಕೆ ಸಿಗಲಿದೆ ₹2 ಲಕ್ಷ: ಪಡೆಯುವುದು ಹೇಗೆ?

ರಾಜ್ಯ ಸರ್ಕಾರದ ವಿವಿಧ ಯೋಜನೆಗಳಲ್ಲಿ ಕಾಯಕ ಕಿರಣ ಯೋಜನೆ ಕೂಡ ಒಂದಾಗಿದೆ. ಈ ಯೋಜನೆಯಡಿ ಸ್ವ ಉದ್ಯೋಗಕ್ಕೆ ಸಹಾಯಧನ ನೀಡಲಾಗುತ್ತದೆ. ಪ್ರವರ್ಗ 3ಬಿ ಅಡಿಯಲ್ಲಿ ಬರುವ ಕರ್ನಾಟಕ ವೀರಶೈವ ಲಿಂಗಾಯಿತ ಹಾಗೂ ಅದರ ಉಪಜಾತಿಗೆ ಸೇರಿದವರು ಈ ಯೋಜನೆಯ ಲಾಭ ಪಡೆಯಬಹುದು ಎಂದು ರಾಜ್ಯ ಸರ್ಕಾರ ತನ್ನ ಅಧಿಕೃತ ಅಂತರ್ಜಾಲ ತಾಣದಲ್ಲಿ ತಿಳಿಸಿದೆ.  

ಈ ಯೋಜನೆ ಪಡೆಯಲು ಇರಬೇಕಾದ ಅರ್ಹತೆಗಳೇನು? ಯೋಜನೆಯಲ್ಲಿ ಸಿಗಲಿರುವ ಸಹಾಯಧನ ಎಷ್ಟು ಎಂಬ ಮಾಹಿತಿ ಇಲ್ಲಿದೆ. 

ಅರ್ಹತೆಗಳು:

• ಅಭ್ಯರ್ಥಿಗಳು ಪ್ರವರ್ಗ–3ಬಿ ಗೆ ಸೇರಿದವರಾಗಿರಬೇಕು. ವೀರಶೈವ ಲಿಂಗಾಯತ ಹಾಗೂ ಉಪಜಾತಿಗೆ ಸೇರಿದವರಾಗಿರಬೇಕು.

• ಅರ್ಜಿದಾರರ ವಾರ್ಷಿಕ ಆದಾಯ ಗ್ರಾಮಾಂತರ ಪ್ರದೇಶದವರಾಗಿದ್ದರೆ ₹98,000 ಹಾಗೂ ನಗರ ಪ್ರದೇಶದವರಾಗಿದ್ದರೆ ₹1.20 ಲಕ್ಷ ಮೀರಿರಬಾರದು.

• ಕರ್ನಾಟಕದ ನಿವಾಸಿಯಾಗಿರಬೇಕು.

• ಅರ್ಜಿದಾರರು ಕನಿಷ್ಠ 18 ವರ್ಷ ಗರಿಷ್ಠ 55 ವರ್ಷದೊಳಗೆ ಇರಬೇಕು.

• ಸರ್ಕಾರದ ಇತರೆ ಯಾವುದೇ ನಿಗಮಗಳಿಂದ ಸಹಾಯಧನ ಅಥವಾ ಸಾಲ ಪಡೆದಿರಬಾರದು.

• ಮಹಿಳೆಯರಿಗೆ ಶೇ 33ರಷ್ಟು ಹಾಗೂ ವಿಶೇಷಚೇತನರಿಗೆ ಶೇ 5ರಷ್ಟು ಮೀಸಲಾತಿ ಸಿಗಲಿದೆ. 

• ಒಂದು ಕುಟುಂಬದಲ್ಲಿ ಒಬ್ಬರು ಮಾತ್ರ ಯೋಜನೆ ಪಡೆಯಲು ಅರ್ಹರಾಗಿರುತ್ತಾರೆ. 

ದೊರೆಯಲಿರುವ ಸಹಾಯಧನ ಎಷ್ಟು?

• ಅರ್ಜಿದಾರರಿಗೆ ವೈಯಕ್ತಿಕ ಸಾಲ ಶೇ 15ರಷ್ಟು ಸಹಾಯಧನದೊಂದಿಗೆ ₹2 ಲಕ್ಷ ದೊರೆಯಲಿದೆ.

• ಯೋಜನೆಯ ಘಟಕ ವೆಚ್ಚಕ್ಕೆ ₹50,000 ಗಳವರೆಗೆ ಶೇ 30ರಷ್ಟು ಅಂದರೆ ₹10,000 ಗಳವರೆಗೆ ಸಹಾಯಧನ ಸಿಗಲಿದೆ. ಉಳಿಕೆ ಶೇ 70ರಷ್ಟು ₹40,000 ಕ್ಕೆ ವಾರ್ಷಿಕ ಶೇ 4ರ ಬಡ್ಡಿ ದರದಲ್ಲಿ ಸಾಲ ಸಿಗಲಿದೆ.

• ಯೋಜನೆಯಲ್ಲಿ ₹50,000 ದಿಂದ ₹ 1ಲಕ್ಷದ ವರೆಗಿನ ಘಟಕ ವೆಚ್ಚಕ್ಕೆ ಶೇ 20ರಷ್ಟು ಅಂದರೆ ₹20,000 ಸಹಾಯಧನ ಸಿಗಲಿದೆ. ಉಳಿಕೆ ಶೇ 80ರಷ್ಟು ₹80,000 ಕ್ಕೆ ವಾರ್ಷಿಕ ಶೇ 4ರ ಬಡ್ಡಿದರದಲ್ಲಿ ಸಾಲ ಸಿಗಲಿದೆ.

• ಘಟಕ ವೆಚ್ಚಕ್ಕೆ ₹ 1ಲಕ್ಷದಿಂದ ₹ 2ಲಕ್ಷದ ವರೆಗೆ ಶೇ 15ರಷ್ಟು ಅಂದರೆ, ₹20,000 ದಿಂದ ₹30,000ಗಳ ವರೆಗೂ ಸಹಾಯಧನ ಸಿಗಲಿದೆ. ಉಳಿಕೆ ಶೇ 85ರಷ್ಟು ₹1.7 ಲಕ್ಷಕ್ಕೆ ವಾರ್ಷಿಕ ಶೇ 2ರ ಬಡ್ಡಿಯಲ್ಲಿ ಸಾಲ ಸಿಗಲಿದೆ.

ಅಗತ್ಯ ದಾಖಲೆಗಳು ಯಾವುವು?

• ಪಿತ್ರಾರ್ಜಿತ ಆಸ್ತಿಯಾಗಿದ್ದರೆ ಆಸ್ತಿ ವಿಭಾಗ ಪತ್ರ, ಎಂ.ಆರ್ ಕಾಫಿ ಒದಗಿಸಬೇಕು

• ಪಹಣಿ

• ಕಂದಾಯ ಪಾವತಿಸಿದ ರಶೀದಿ.

ಮರುಪಾವತಿ ವಿಧಾನ

• ಯೋಜನೆಯಲ್ಲಿ ಪಡೆದ ಸಾಲಕ್ಕೆ ವಾರ್ಷಿಕ ಶೇ 4ರ ಬಡ್ಡಿದರದಲ್ಲಿ 34 ಕಂತುಗಳಲ್ಲಿ ಮರು ಪಾವತಿ ಮಾಡಬೇಕು. 

ಯೋಜನೆ ಕುರಿತು ಹೆಚ್ಚಿನ ಮಾಹಿತಿ ಪಡೆಯಲು ಜಿಲ್ಲಾಧಿಕಾರಿ ಕಚೇರಿಗೆ ಭೇಟಿ ನೀಡುವುದು. ಇಲಾಖೆಯ ಅಂತರ್ಜಾಲ ತಾಣ.