ಏಪ್ರಿಲ್ 4ರಿಂದ ಐಪಿಎಲ್

ಮುಂಬೈ (ಐಎಎನ್‌ಎಸ್): ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಟ್ವೆಂಟಿ-20 ಕ್ರಿಕೆಟ್‌ನ ಐದನೇ ವರ್ಷದ ಟೂರ್ನಿ ಏಪ್ರಿಲ್ 4 ರಿಂದ ಮೇ 27ರ ವರೆಗೆ ನಡೆಯಲಿದೆ. ಉದ್ಘಾಟನಾ ಹಾಗೂ ಫೈನಲ್ ಪಂದ್ಯಕ್ಕೆ ಆತಿಥ್ಯ ವಹಿಸುವ ಅವಕಾಶ ಚೆನ್ನೈಗೆ ಲಭಿಸಿದೆ.

ಭಾರತ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಟೂರ್ನಿಯ ವೇಳಾಪಟ್ಟಿಯನ್ನು ಶುಕ್ರವಾರ ಪ್ರಕಟಿಸಿತು. ಎಂ.ಎ. ಚಿದಂಬರಂ ಕ್ರೀಡಾಂಗಣದಲ್ಲಿ ಏ.4 ರಂದು ನಡೆಯುವ ಮೊದಲ ಪಂದ್ಯದಲ್ಲಿ ಕಳೆದ ಬಾರಿಯ ಚಾಂಪಿಯನ್ ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಮುಂಬೈ ಇಂಡಿಯನ್ಸ್ ವಿರುದ್ಧ ಪೈಪೋಟಿ ನಡೆಸಲಿದೆ. ಈ ಬಾರಿ ಒಂಬತ್ತು ತಂಡಗಳು ಕಣದಲ್ಲಿದ್ದು, 12 ತಾಣಗಳಲ್ಲಿ ಒಟ್ಟು 76 ಪಂದ್ಯಗಳು ನಡೆಯಲಿವೆ. ಕಳೆದ ವರ್ಷ 10 ತಂಡಗಳಿದ್ದವು. ಆದರೆ ಕೊಚ್ಚಿ ಟಸ್ಕರ್ಸ್ ಕೇರಳ ಈ ಬಾರಿ ಆಡುತ್ತಿಲ್ಲ. ಐಪಿಎಲ್‌ನ ನಿಯಮ ಉಲ್ಲಂಘಿಸಿದ್ದಕ್ಕೆ ಕೊಚ್ಚಿ ತಂಡದ ಜೊತೆಗಿನ ಒಪ್ಪಂದವನ್ನು ರದ್ದುಪಡಿಸಲಾಗಿತ್ತು.

ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ತಂಡ ದೆಹಲಿ ಡೇರ್‌ಡೆವಿಲ್ಸ್ ವಿರುದ್ಧದ ಪಂದ್ಯದೊಂದಿಗೆ ಪ್ರಶಸ್ತಿಯೆಡೆಗಿನ ಅಭಿಯಾನ ಆರಂಭಿಸಲಿದೆ. ಈ ಪಂದ್ಯ ಏಪ್ರಿಲ್ 7 ರಂದು ಬೆಂಗಳೂರಿನಲ್ಲಿ ನಡೆಯಲಿದೆ.

ಲೀಗ್ ಹಂತದಲ್ಲಿ 72 ಪಂದ್ಯಗಳು ನಡೆಯಲಿವೆ. ಪ್ರತಿ ತಂಡಗಳು 16 ಪಂದ್ಯಗಳನ್ನು ಆಡಲಿವೆ. ಇದರಲ್ಲಿ ಎಂಟು ಪಂದ್ಯಗಳು ಆಯಾ ತಂಡಗಳ ತವರು ನೆಲದಲ್ಲಿ ನಡೆಯಲಿವೆ. ಎರಡು ಪ್ಲೇ ಆಫ್ ಪಂದ್ಯಗಳು (ಮೇ 22, 23) ಬೆಂಗಳೂರಿನಲ್ಲಿ ನಡೆಯಲಿದ್ದರೆ, ಇನ್ನೊಂದು ಪ್ಲೇ ಆಫ್ (ಮೇ 25) ಹಾಗೂ ಫೈನಲ್ (ಮೇ 27) ಪಂದ್ಯಕ್ಕೆ ಚೆನ್ನೈ ಆತಿಥ್ಯ ವಹಿಸಲಿದೆ. `ಪುಣೆ ವಾರಿಯರ್ಸ್~ ತಂಡದ `ಹೋಮ್~ ಪಂದ್ಯಗಳು ಪುಣೆಯಲ್ಲಿ ನಿರ್ಮಾಣಗೊಳ್ಳುತ್ತಿರುವ ನೂತನ ಕ್ರೀಡಾಂಗಣದಲ್ಲಿ ನಡೆಯಲಿವೆ. ಆದರೆ ಕ್ರೀಡಾಂಗಣದ ಕಾಮಗಾರಿ ಪೂರ್ಣಗೊಂಡ ಬಳಿಕ ಈ ಕುರಿತು ಅಂತಿಮ ನಿರ್ಧಾರ ಕೈಗೊಳ್ಳಲಾಗುವುದು. ಧರ್ಮಶಾಲಾ, ಕಟಕ್ ಮತ್ತು ವಿಶಾಖಪಟ್ಟಣ ತಲಾ ಎರಡು ಪಂದ್ಯಗಳಿಗೆ ವೇದಿಕೆಯೊದಗಿಸಲಿವೆ.