ಪಾಕ್‌ ಪಂದ್ಯಕ್ಕೆ ಸ್ಟೊಯಿನಿಸ್‌ ಅಲಭ್ಯ

ಟಾಂಟನ್‌: ಪಾಕಿಸ್ತಾನ ವಿರುದ್ಧ ಬುಧವಾರ ನಡೆಯಲಿರುವ ಮುಂದಿನ ಪಂದ್ಯದಲ್ಲಿ ಆಲ್‌ರೌಂಡರ್‌ ಮಾರ್ಕಸ್‌ ಸ್ಟೊಯಿನಿಸ್‌ ಆಡುವುದಿಲ್ಲ ಎಂದು ಆಸ್ಟ್ರೇಲಿಯಾ ತಂಡದ ನಾಯಕ ಆ್ಯರನ್‌ ಫಿಂಚ್‌ ಮಂಗಳವಾರ ತಿಳಿಸಿದರು.

ವಿಶ್ವಕಪ್‌ನಲ್ಲಿ ತಂಡದ ಪರ ಮೂರೂ ಪಂದ್ಯಗಳನ್ನು ಆಡಿದ್ದ ಸ್ಟೊಯಿನಿಸ್‌, ಭಾರತ ವಿರುದ್ಧ ಭಾನುವಾರ ನಡೆದ ಪಂದ್ಯದಲ್ಲಿ ಪ‍ಕ್ಕೆಲುಬು ನೋವಿನಿಂದ ಬಳಲುತ್ತಿದ್ದಾರೆ. ಆಲ್‌ರೌಂಡರ್‌ ಮಿಷಲ್‌ ಮಾರ್ಷ್‌ ಅವರು ಮುಂಜಾಗ್ರತಾ ಕ್ರಮವಾಗಿ ತಂಡವನ್ನು ಸೇರಿಕೊಳ್ಳಲಿದ್ದಾರೆ. ಆದರೆ ಅವರು 15ರ ತಂಡದಲ್ಲಿ ಸ್ಟೊಯಿನಿಸ್‌ ಅವರ ಬದಲು ಖಾಯಂ ಆಗಿ ಇರುವರೇ ಎಂಬುದನ್ನು ತಂಡ ಇನ್ನೂ ನಿರ್ಧರಿಸಿಲ್ಲ.

ಭಾರತ ವಿರುದ್ಧದ ಪಂದ್ಯದಲ್ಲಿ ಸ್ಟೊಯಿನಿಸ್‌ 7 ಓವರುಗಳಲ್ಲಿ 62 ರನ್‌ ತೆತ್ತು ದುಬಾರಿಯೆನಿಸಿದರೂ, ವಿರಾಟ್‌ ಕೊಹ್ಲಿ ಮತ್ತು ಮಹೇಂದ್ರ ಸಿಂಗ್‌ ಧೋನಿ ಅವರ ವಿಕೆಟ್‌ ಪಡೆದಿದ್ದರು.

ಭಾರತ ಎದುರು ಸೋಲನುಭವಿಸುವ ಮೊದಲು ಆಸ್ಟ್ರೇಲಿಯಾ ಮೊದಲ ಎರಡು ಪಂದ್ಯಗಳಲ್ಲಿ ಕ್ರಮವಾಗಿ ಅಫ್ಗಾನಿಸ್ತಾನ ಮತ್ತು ವೆಸ್ಟ್‌ ಇಂಡೀಸ್ ವಿರುದ್ಧ ಜಯಗಳಿಸಿತ್ತು.