ರೈನಾ ದಾಖಲೆ ಹಿಂದಿಕ್ಕಿದ ಧೋನಿ

ದುಬೈ: ಚೆನ್ನೈ ಸೂಪರ್ ಕಿಂಗ್ಸ್‌ ತಂಡದ ನಾಯಕ ಮಹೇಂದ್ರಸಿಂಗ್ ಧೋನಿ ಇಂಡಿಯನ್ ಪ್ರೀಮಿಯರ್ ಲೀಗ್‌ ಟೂರ್ನಿಯಲ್ಲಿ ಅತಿ ಹೆಚ್ಚು ಪಂದ್ಯಗಳನ್ನು ಆಡಿದ ಆಟಗಾರನೆಂಬ ದಾಖಲೆ ಬರೆದರು.

ಶುಕ್ರವಾರ 194ನೇ ಪಂದ್ಯ ಆಡಿದ ಅವರು ತಮ್ಮ ‘ಗೆಳೆಯ’ ಸುರೇಶ್ ರೈನಾ ಅವರ ದಾಖಲೆಯನ್ನು ಮೀರಿ ನಿಂತರು.

ಸಿಎಸ್‌ಕೆ ತಂಡವನ್ನು ಧೋನಿಯವರು ಇದುವರೆಗೆ 11 ಋತುಗಳಲ್ಲಿ ಪ್ರತಿನಿಧಿಸಿದ್ದಾರೆ. 2013ರ ಸ್ಪಾಟ್ ಫಿಕ್ಸಿಂಗ್‌ನಲ್ಲಿ ಸಿಎಸ್‌ಕೆ ತಂಡವು 2016 ಮತ್ತು 2017ರಲ್ಲಿ ಅಮಾನತು ಶಿಕ್ಷೆಗೆ ಒಳಗಾಗಿತ್ತು. ಆಗ ಮಹಿ ಎರಡು ವರ್ಷ ಪುಣೆ ಸೂಪರ್‌ಜೈಂಟ್ಸ್‌ ತಂಡದಲ್ಲಿ ಆಡಿದ್ದರು. ಅಲ್ಲಿ ಅವರು 30 ಪಂದ್ಯಗಳಲ್ಲಿ ಆಡಿದ್ದರು. ಸಿಎಸ್‌ಕೆಗೆ 164 ಪಂದ್ಯಗಳನ್ನು ಆಡಿದ್ದಾರೆ.

2010, 2011 ಮತ್ತು 2018ರಲ್ಲಿ ಅವರ ನಾಯಕತ್ವದಲ್ಲಿ ಸಿಎಸ್‌ಕೆ ಐಪಿಎಲ್ ಪ್ರಶಸ್ತಿ ಗೆದ್ದುಕೊಂಡಿತ್ತು. ಒಟ್ಟು ಒಂಬತ್ತು ಫೈನಲ್‌ಗಳಲ್ಲಿ ಅವರು ಆಡಿದ್ದಾರೆ. ಒಂದೇ ತಂಡದ ಪರವಾಗಿ ಹೆಚ್ಚು ಪಂದ್ಯಗಳನ್ನು ಆಡಿರುವ ನಾಯಕರ ಪಟ್ಟಿಯಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರಿನ ವಿರಾಟ್ ಕೊಹ್ಲಿ (180 ಪಂದ್ಯ) ಅಗ್ರಸ್ಥಾನದಲ್ಲಿದ್ದಾರೆ. 13 ಆವೃತ್ತಿಗಳಲ್ಲಿಯೂ ಅವರು ಆರ್‌ಸಿಬಿಯನ್ನೇ ಪ್ರತಿನಿಧಿಸಿದ್ದಾರೆ.