ಸಾನಿಯಾ ಚಂದೋಕ್‌ ಜತೆ ನಿಶ್ಚಿತಾರ್ಥ ಮಾಡಿಕೊಂಡ ಅರ್ಜುನ್‌ ತೆಂಡೂಲ್ಕರ್‌: ವರದಿ

ಮುಂಬೈ: ಭಾರತೀಯ ಕ್ರಿಕೆಟ್‌ನ ದಂತಕಥೆ ಸಚಿನ್‌ ತೆಂಡೂಲ್ಕರ್‌ ಪುತ್ರ ಅರ್ಜುನ್‌ ತೆಂಡೂಲ್ಕರ್‌ ಅವರು ಸಾನಿಯಾ ಚಂದೋಕ್‌ ಎನ್ನುವವರೊಂದಿಗೆ ನಿಶ್ಚಿತಾರ್ಥ ಮಾಡಿಕೊಂಡಿದ್ದಾರೆ ಎಂದು ವರದಿಗಳು ತಿಳಿಸಿವೆ. 

ಸಾಮಾಜಿಕ ಜಾಲತಾಣಗಳಲ್ಲಿ ಅರ್ಜುನ್‌–ಸಾನಿಯಾ ನಿಶ್ಚಿತಾರ್ಥದ ವಿಚಾರ ಟ್ರೆಂಡ್ ಸೃಷ್ಟಿಸಿದ್ದು, ‘ಅರ್ಜುನ್‌ ಅವರ ಹೊಸ ಜೀವನದ ಪ್ರಾರಂಭ’ ಎನ್ನುವ ಕಮೆಂಟ್‌ಗಳು ಹರಿದಾಡುತ್ತಿವೆ.

ಆದರೆ ಈ ಕುರಿತು, ತೆಂಡೂಲ್ಕರ್‌ ಕುಟುಂಬವಾಗಲೀ ಅಥವಾ ಸಾನಿಯಾ ಅವರ ಕುಟುಂಬವಾಗಲೀ ಯಾವುದೇ ಅಧಿಕೃತ ಹೇಳಿಕೆ ಬಿಡುಗಡೆ ಮಾಡಿಲ್ಲ.

ಇಂಡಿಯಾ ಟುಡೇ ವರದಿ ಪ್ರಕಾರ, ಅರ್ಜುನ್‌ ಹಾಗೂ ಸಾನಿಯಾ ಆಪ್ತರ ಸಮ್ಮುಖದಲ್ಲಿ ಉಂಗುರ ಬದಲಾಯಿಸಿಕೊಂಡಿದ್ದಾರೆ. ಕಾರ್ಯಕ್ರಮದಲ್ಲಿ ಸ್ನೇಹಿತರು ಮತ್ತು ಕುಟುಂಬಸ್ಥರು ಮಾತ್ರ ಭಾಗಿಯಾಗಿದ್ದರು.

ಅರ್ಜುನ್‌ ತೆಂಡೂಲ್ಕರ್‌ ಮುಂಬೈ ಇಂಡಿಯನ್ಸ್‌ ತಂಡದ ಆಟಗಾರ, ಸಾನಿಯಾ ಅವರು ಮುಂಬೈನ ಖ್ಯಾತ ಉದ್ಯಮಿ ರವಿ ಘಾಯ್‌ ಅವರ ಮೊಮ್ಮಗಳು ಎನ್ನಲಾಗಿದೆ.

ಸಾನಿಯಾ ಕೂಡ ಉದ್ಯಮದಲ್ಲಿ ತೊಡಗಿಸಿಕೊಂಡಿದ್ದು, ‘ಮಿ.ಪಾವ್ಸ್‌ ಪೆಟ್‌ ಸ್ಪಾ & ಸ್ಟೋರ್‌ ಎಲ್‌ಎಲ್‌ಪಿ ಎನ್ನುವ ಸಾಕು ನಾಯಿಗಳ ಸ್ಪಾ ಉದ್ಯಮ ನಡೆಸುತ್ತಿದ್ದಾರೆ ಎಂದು ವರದಿಯಾಗಿದೆ.