ಬಿಸಿಸಿಐ ಉಪಾಧ್ಯಕ್ಷ ರಾಜೀವ್ ಶುಕ್ಲಾಗೆ ನೋಟಿಸ್ ಜಾರಿ

ಮುಂಬಯಿ: ಬಿಸಿಸಿಐ ಉಪಾಧ್ಯಕ್ಷರಾಗಿ ಹೊಸದಾಗಿ ಆಯ್ಕೆಯಾಗಿರುವ ರಾಜೀವ್ ಶುಕ್ಲಾ ಅವರಿಗೆ ಹಿತಾಸಕ್ತಿ ಸಂಘರ್ಷದ ಹಿನ್ನಲೆಯಲ್ಲಿ ನೋಟಿಸ್ ಜಾರಿ ಮಾಡಲಾಗಿದೆ. ಬಿಸಿಸಿಐ ನೈತಿಕಸಮಿತಿ ಅಧಿಕಾರಿ ಡಿ ಕೆ ಜೈನ್, ಗುರುವಾರ ನೋಟಿಸ್ ಜಾರಿ ಮಾಡಿದ್ದಾರೆ. ನೋಟಿಸ್‌ಗೆ ಉತ್ತರಿಸಲು ಎರಡು ವಾರಗಳ ಸಮಯಾವಕಾಶವನ್ನು ನೀಡಲಾಗಿದೆ.

ಜನವರಿ 8ರಂದು ಮಧ್ಯ ಪ್ರದೇಶ ಕ್ರಿಕೆಟ್ ಅಸೋಸಿಯೇಶನ್‌ನ ಮಾಜಿ ಸದಸ್ಯ ಸಂಜೀವ್ ಗುಪ್ತಾ ಎಂಬವರು ರಾಜೀವ್ ಶುಕ್ಲಾ ವಿರುದ್ಧ ಹಿತಾಸಕ್ತಿ ಸಂಘರ್ಷದ ಬಗ್ಗೆ ದೂರು ನೀಡಿದ್ದರು. ಉತ್ತರ ಪ್ರದೇಶ ಕ್ರಿಕೆಟ್ ಅಸೋಸಿಯೇಶನ್ ನಿರ್ದೇಶಕರೂ ಆಗಿರುವ ರಾಜೀವ್ ಶುಕ್ಲಾ, ಅದೇ ಸಮಯದಲ್ಲಿ ಬಿಸಿಸಿಐ ಉಪಾಧ್ಯಕ್ಷರಾಗಿರುವುದನ್ನು ಆಕ್ಷೇಪಿಸಿ ಅರ್ಜಿ ಸಲ್ಲಿಸಿದ್ದರು.

ಬಿಸಿಸಿಐ ನೀತಿ ಮತ್ತು ನಿಯಮಕ್ಕೆ ಅನುಸಾರ ಹೊಸ ಉಪಾಧ್ಯಕ್ಷರ ನೇಮಕವನ್ನು ಪ್ರಶ್ನಿಸಲಾಗಿರುವುದರಿಂದ, ನೈತಿಕ ಸಮಿತಿ ಅಧಿಕಾರಿ ಶುಕ್ಲಾಗೆ ನೋಟಿಸ್ ಜಾರಿಮಾಡಿದ್ದಾರೆ.

ಬಿಸಿಸಿಸಿ ಪ್ರಕಾರ ಓರ್ವ ವ್ಯಕ್ತಿ, ಏಕಕಾಲಕ್ಕೆ ಒಂದಕ್ಕಿಂತ ಹೆಚ್ಚಿನ ಹುದ್ದೆಗಳನ್ನು ಹೊಂದುವಂತಿಲ್ಲ. ಬಿಸಿಸಿಐ ನೋಟಿಸ್ ಕುರಿತಂತೆ ಶುಕ್ಲಾ ಯಾವುದೇ ಹೇಳಿಕೆ ನೀಡಿಲ್ಲ. ಐಪಿಎಲ್ ಮಾಜಿ ಚೇರ್ಮನ್ ಕೂಡಾ ಆಗಿರುವ ಶುಕ್ಲಾ, ಡಿ. 24, 2020ರಂದು ನಡೆದಿದ್ದ ಬಿಸಿಸಿಐ ವಾರ್ಷಿಕ ಮಹಾಸಭೆಯಲ್ಲಿ ಉಪಾಧ್ಯಕ್ಷರಾಗಿ ಅವಿರೋಧವಾಗಿ ಆಯ್ಕೆಯಾಗಿದ್ದರು.

ಇದನ್ನೂ ಓದಿ:PV Web Exclusive: ಹನುಮನ ಸಂಯಮದ ಗುಟ್ಟುಗಳು...