IND vs ENG | ಜೇಮಿ– ಬ್ರೂಕ್‌ ಪ್ರತ್ಯಾಕ್ರಮಣ: ಫಾಲೊಆನ್‌ನಿಂದ ಇಂಗ್ಲೆಂಡ್‌ ಪಾರು

ಎಜ್‌ಬಾಸ್ಟನ್‌: ಇಂಗ್ಲೆಂಡ್‌ ಕ್ರಿಕೆಟ್‌ನ ಭಾವಿ ಬ್ಯಾಟಿಂಗ್ ತಾರೆಗಳಾದ ಹ್ಯಾರಿ ಬ್ರೂಕ್ ಮತ್ತು ಜೇಮಿ ಸ್ಮಿತ್ ಅವರು ಭಾರತದ ಬೌಲರ್‌ಗಳ ಮೇಲೆ ಸವಾರಿ ನಡೆಸಿ ‘ಬಾಝ್‌ಬಾಲ್‌’ ಕ್ರಿಕೆಟ್‌ನ ಉಗ್ರ ರೂಪ ಪ್ರದರ್ಶಿಸಿದರು. ಎರಡನೇ ಟೆಸ್ಟ್‌ನ ಮೂರನೇ ದಿನವಾದ ಶುಕ್ರವಾರ ಇಬ್ಬರೂ ಭರ್ಜರಿ ಶತಕಗಳನ್ನು ಬಾರಿಸಿದರು.

ಆದರೆ ಇವರಿಬ್ಬರಿಂದ ಆದ ಹಾನಿ ತೀವ್ರವಾಗದಂತೆ, ದಿನದ ಕೊನೆಯ ಅವಧಿಯಲ್ಲಿ ಮೊಹಮ್ಮದ್ ಸಿರಾಜ್ (70ಕ್ಕೆ6) ಮತ್ತು ಆಕಾಶ್ ದೀಪ್‌ (88ಕ್ಕೆ4) ನೋಡಿಕೊಂಡರು.

ಒಂದು ಹಂತದಲ್ಲಿ ಇಂಗ್ಲೆಂಡ್‌ 84 ರನ್‌ಗಳಾಗುಷ್ಟರಲ್ಲಿ 5 ವಿಕೆಟ್‌ ಕಳೆದುಕೊಂಡು ಅಪಾಯಕ್ಕೆ ಸಿಲುಕಿತ್ತು. ಈ ವೇಳೆ ಪ್ರತ್ಯಾಕ್ರಮಣ ನಡೆಸಿದ ಬ್ರೂಕ್ (158, 234 ಎಸೆತ) ಮತ್ತು ಸ್ಮಿತ್‌ (ಔಟಾಗದೇ 184, 207 ಎಸೆತ) ಆರನೇ ವಿಕೆಟ್‌ಗೆ  303 ರನ್‌ಗಳ ಅಮೂಲ್ಯ ಜೊತೆಯಾಟದಲ್ಲಿ ಪಾಲ್ಗೊಂಡು ದಿನದ ಬಹುತೇಕ ಅವಧಿಯಲ್ಲಿ ತಂಡದ ರಕ್ಷಣೆಗೆ ನಿಂತರು. ಆದರೆ ಕೊನೆಯ ಅವಧಿಯಲ್ಲಿ ಎರಡನೇ ಹೊಸ ಚೆಂಡಿನಿಂದ ಸಿರಾಜ್ ಮತ್ತು ಆಕಾಶ್‌ ಮೋಡಿ ಮಾಡಿದ್ದರಿಂದ ಭಾರತ ಎಜ್‌ಬಾಸ್ಟನ್‌ನಲ್ಲಿ ಮರಳಿ ಹಿಡಿತ ಪಡೆಯಿತು. ಇವರಿಬ್ಬರ ಸಾಹಸದಿಂದ ಆತಿಥೇಯ ತಂಡದ ಮೊದಲ ಇನಿಂಗ್ಸ್‌ 407 ರನ್‌ಗಳಿಗೆ ಕೊನೆಗೊಂಡಿತು. ಭಾರತ 180 ರನ್‌ಗಳ ಮುನ್ನಡೆ ಪಡೆಯಿತು.

ಮೂರನೇ ದಿನದಾಟ ಕೊನೆ ಗೊಂಡಾಗ ಭಾರತ ಎರಡನೇ ಸರದಿ ಯಲ್ಲಿ 1 ವಿಕೆಟ್‌ಗೆ 64 ರನ್ ಗಳಿಸಿದೆ. ಒಟ್ಟಾರೆ ಮುನ್ನಡೆ 244 ರನ್‌ಗಳಿಗೆ ಉಬ್ಬಿದೆ.

ದಿನದ ಆರಂಭದ ಸ್ಪೆಲ್‌ನಲ್ಲಿ ಸಿರಾಜ್‌ ಅವರು ಸತತ ಎರಡು ಎಸೆತಗಳಲ್ಲಿ ಜೋ ರೂಟ್‌ ಮತ್ತು ಬೆನ್‌ಸ್ಟೋಕ್ಸ್‌ ಅವರ ವಿಕೆಟ್‌ಗಳನ್ನು ಪಡೆದಿದ್ದರು. ಈ ಎರಡು ಕ್ಷಣಗಳನ್ನು ಬಿಟ್ಟರೆ, ನಿರ್ಜೀವ ಪಿಚ್‌ನಲ್ಲಿ ಬೌಲರ್‌ಗಳು ಹೆಚ್ಚಿನ ಅವಧಿಯಲ್ಲಿ ಬಸವಳಿದರು.

26 ವರ್ಷ ವಯಸ್ಸಿನ ಬ್ರೂಕ್ ಮತ್ತು 24 ವರ್ಷ ವಯಸ್ಸಿನ ಸ್ಮಿತ್ ಅವರು ಪ್ರತ್ಯಾಕ್ರಮಣ ನಡೆಸಿ ವೇಗವಾಗಿ ಶತಕ ಗಳಿಸಿದರು. ಉತ್ಸಾಹದಲ್ಲಿದ್ದ ಭಾರತ ಬೌಲರ್‌ಗಳನ್ನು ಇವರಿಬ್ಬರು  ಲಂಚ್‌ಗೆ ಮೊದಲು ತೀವ್ರವಾಗಿ ದಂಡಿಸಿದರು. ಸ್ಮಿತ್ ಮತ್ತು ಬ್ರೂಕ್ಸ್‌ ಆಟದ ರೀತಿಗೆ ಬೌಲರ್‌ಗಳು ಬೆಚ್ಚಿದರು. ಸ್ಮಿತ್‌ ಅವರಂತೂ ಪ್ರಸಿದ್ಧ ಕೃಷ್ಣ ಅವರ ಒಂದೇ ಓವರಿನಲ್ಲಿ 23 ರನ್ ಬಾಚಿ ವಿಶ್ವಾಸ ಹೆಚ್ಚಿಸಿಕೊಂಡರು. ಬ್ರೂಕ್ಸ್‌ ಕೂಡ ಹಿಂದೆಬೀಳಲಿಲ್ಲ. ರನ್‌ ಹೊಳೆ ಹರಿಯತೊಡಗಿತು. ಲಂಚ್‌ಗೆ ಮೊದಲು 27 ಓವರುಗಳಲ್ಲಿ 172 ರನ್‌ಗಳು (6.37 ರನ್‌ರೇಟ್‌) ಹರಿದುಬಂದವು.

ಭಾರತ ವಿವಿಧ ತಂತ್ರಗಳನ್ನು ಬಳಸಿತು. ಆರಂಭದಲ್ಲಿ ಶಾರ್ಟ್‌ ಬಾಲ್‌ಗಳ ಮೂಲಕ ಸವಾಲೆಸೆಯಿತು. ನಂತರ ಆಫ್‌ ಸ್ಟಂಪ್‌ ಆಚೆ ಬೌಲ್‌ ಮಾಡಿ ಸಹನೆ ಪರೀಕ್ಷಿಸಿತು. ಆದರೆ ಈ ಇಬ್ಬರು ಆಕರ್ಷಕ ಬ್ಯಾಟರ್‌ಗಳು ಈ ತಂತ್ರಗಳನ್ನು ಸಮರ್ಥವಾಗಿ ನಿಭಾಯಿಸಿದರು. ಈ ಜೊತೆಯಾಟ ಟೀ ನಂತರವೂ ಅಪಾ ಯಕಾರಿಯಾಗಿ ಬೆಳೆಯುವಂತೆ ಕಂಡಿತು. 

ಇತರ ಬೌಲರ್‌ಗಳಿಗೆ ಹೋಲಿಸಿದರೆ, ಸ್ವಲ್ಪ ಪರಿಣಾಮಕಾರಿಯಾಗಿದ್ದ ಸಿರಾಜ್ ಮತ್ತು ಆಕಾಶ್‌ ಅವರು ಎರಡನೇ ಹೊಸ ಚೆಂಡಿನಲ್ಲಿ ಇಂಗ್ಲೆಂಡ್‌ನ
ಲೆಕ್ಕಾಚಾರವನ್ನು ತಲೆಕೆಳಗೆ ಮಾಡಿದರು.  ಮೊದಲಿಗೆ ಆಕಾಶ್ ಎರಡು ವಿಕೆಟ್‌ಗಳ ಮೂಲಕ ಪೆಟ್ಟು ನೀಡಿದರು. ಸ್ವಿಂಗ್ ಆದ ಚೆಂಡು, ಬ್ರೂಕ್‌ ರಕ್ಷಣೆಯನ್ನು ಭೇದಿಸಿ ಬೇಲ್ಸ್‌ ಉರುಳಿಸಿತು. ಆ ಮೂಲಕ ಭಾರಿ ಜೊತೆಯಾಟ ಮುರಿಯಿತು. ಆಕಾಶ್‌ ನಂತರ ಸ್ಥಳೀಯ ಆಟಗಾರ ಕ್ರಿಸ್‌ ವೋಕ್ಸ್‌ ಅವರ ವಿಕೆಟ್‌ ಪಡೆದರು.

ಆಕ್ರಮಣಕಾರಿಯಾಗಿದ್ದ ಸಿರಾಜ್ ನಂತರ ಇಂಗ್ಲೆಂಡ್‌ನ ಬಾಲ ಬೆಳೆಯದಂತೆ ನೋಡಿಕೊಂಡರು. 38 ಟೆಸ್ಟ್‌ಗಳಲ್ಲಿ ನಾಲ್ಕನೇ ಬಾರಿ ಐದು ವಿಕೆಟ್‌ಗಳ ಗೊಂಚಲು ಪಡೆದರು.

ಸಂಕ್ಷಿಪ್ತ ಸ್ಕೋರ್‌: ಮೊದಲ ಇನಿಂಗ್ಸ್‌: ಭಾರತ: 151 ಓವರ್‌ಗಳಲ್ಲಿ 587. ಇಂಗ್ಲೆಂಡ್‌ 89.3 ಓವರ್‌ಗಳಲ್ಲಿ 407 (ಗುರುವಾರ 3ಕ್ಕೆ 77) (ಹ್ಯಾರಿ ಬ್ರೂಕ್‌ 158, ಜೇಮಿ ಸ್ಮಿತ್‌ ಔಟಾಗದೇ 184; ಆಕಾಶ್‌ ದೀಪ್‌ 88ಕ್ಕೆ 4, ಮೊಹಮ್ಮದ್‌ ಸಿರಾಜ್‌ 70ಕ್ಕೆ 6). ಎರಡನೇ ಇನಿಂಗ್ಸ್‌: ಭಾರತ: 13 ಓವರುಗಳಲ್ಲಿ 1 ವಿಕೆಟ್‌ಗೆ 64 (ಯಶಸ್ವಿ ಜೈಸ್ವಾಲ್‌ 28, ಕೆ.ಎಲ್‌. ರಾಹುಲ್‌ ಔಟಾಗದೇ 28, ಕರುಣ್‌ ನಾಯರ್‌ ಔಟಾಗದೇ 7; ಜೋಶ್‌ ಟಂಗ್ 12ಕ್ಕೆ 1)

ಗಿಲ್ ದ್ವಿಶತಕ...

ಎರಡನೇ ದಿನದಾಟದಲ್ಲಿ ಭಾರತದ ನಾಯಕ ಶುಭಮನ್ ಗಿಲ್ ಅಮೋಘ ದ್ವಿಶತಕ ಗಳಿಸಿದ್ದರು. 387 ಎಸೆತಗಳಲ್ಲಿ 30 ಬೌಂಡರಿ ಹಾಗೂ ಮೂರು ಸಿಕ್ಸರ್ ನೆರವಿನಿಂದ 269 ರನ್ ಗಳಿಸಿದರು.

ಆ ಮೂಲಕ ಭಾರತ 587 ರನ್‌ ಪೇರಿಸಿತ್ತು. ರವೀಂದ್ರ ಜಡೇಜ (89) ಹಾಗೂ ಯಶಸ್ವಿ ಜೈಸ್ವಾಲ್ (87) ಆಕರ್ಷಕ ಅರ್ಧಶತಕ ಗಳಿಸಿದ್ದರು. ವಾಷಿಂಗ್ಟನ್ ಸುಂದರ್ (42) ರನ್‌ಗಳ ಉಪಯುಕ್ತ ಕೊಡುಗೆ ನೀಡಿದ್ದರು.