ಐಪಿಎಲ್‌ನಲ್ಲಿ ಆಡಲು ದುಬೈ ತಲುಪಿದ ಗಿಡಿ, ಡು ಪ್ಲೆಸಿ, ರಬಾಡ

ದುಬೈ: ದಕ್ಷಿಣ ಆಫ್ರಿಕಾ ಆಟಗಾರರಾದ ಫಾಫ್‌ ಡು ಪ್ಲೆಸಿ, ಲುಂಗಿ ಗಿಡಿ ಹಾಗೂ ಕಗೀಸೊ ರಬಾಡ ಅವರು ಐಪಿಎಲ್‌ ಟೂರ್ನಿಯಲ್ಲಿ ಆಡಲು ಮಂಗಳವಾರ ನಸುಕಿನ ಜಾವ ದುಬೈಗೆ ಬಂದಿಳಿದರು.

ದಕ್ಷಿಣ ಆಫ್ರಿಕಾ ತಂಡದ ಮಾಜಿ ನಾಯಕ ಡು ಪ್ಲೆಸಿ ಹಾಗೂ ವೇಗಿ ಲುಂಗಿ ಗಿಡಿ ಅವರು ಚೆನ್ನೈ ಸೂಪರ್‌ ಕಿಂಗ್ಸ್‌ ತಂಡದ ಶಿಬಿರವನ್ನು ಸೇರಿಕೊಂಡಿದ್ದಾರೆ. ಮತ್ತೊಬ್ಬ ವೇಗಿ ರಬಾಡ ಅವರು ಡೆಲ್ಲಿ ಕ್ಯಾಪಿಟಲ್ಸ್‌ ತಂಡದ ಪರ ಆಡಲಿದ್ದಾರೆ.

ಎರಡೂ ಫ್ರ್ಯಾಂಚೈಸ್‌ಗಳು (ಡೆಲ್ಲಿ ಹಾಗೂ ಸಿಎಸ್‌ಕೆ) ದಕ್ಷಿಣ ಆಫ್ರಿಕಾ ಆಟಗಾರರ ಆಗಮನವನ್ನು ಟ್ವೀಟರ್‌ನಲ್ಲಿ ಹಂಚಿಕೊಂಡಿವೆ.

ಈ ಮೂರು ಮಂದಿ ಆಟಗಾರರು ಆರು ದಿನಗಳ ಕಾಲ ಪ್ರತ್ಯೇಕವಾಸದಲ್ಲಿ ಇರುವರು. ನಿಯಮದನ್ವಯ ಈ ಅವಧಿಯ 1, 3 ಹಾಗೂ ಆರನೆಯ ದಿನಗಳಂದು ಕೋವಿಡ್‌ ಪರೀಕ್ಷೆ ಮಾಡಿಸಿಕೊಳ್ಳಲಿದ್ದಾರೆ.