ಯುವೆಂಟಸ್ ತಂಡ ಸೇರಿದ ಕ್ರಿಸ್ಟಿಯಾನೊ ರೊನಾಲ್ಡೊ

ಮ್ಯಾಡ್ರಿಡ್:ರಿಯಲ್ ಮ್ಯಾಡ್ರಿಡ್ ತಂಡದ ಪ್ರಮುಖ ಆಟಗಾರ ಕ್ರಿಸ್ಟಿಯಾನೊ ರೊನಾಲ್ಡೊ ಇಟೆಲಿ ಮೂಲದ ಯುವೆಂಟಸ್ ತಂಡ ಸೇರಿದ್ದಾರೆ. 2009ರಿಂದ ಸ್ಪಾನಿಶ್ ಕ್ಲಬ್ ರಿಯಲ್ ಮ್ಯಾಡ್ರಿಡ್ ತಂಡದ ಸೂಪರ್ ಸ್ಟಾರ್ ಆಗಿದ್ದ ಕ್ರಿಸ್ಟಿಯಾನೊ ಅವರನ್ನು 112 ಮಿಲಿಯನ್ಯೂರೊಗೆ ಯುವೆಂಟಸ್ ತಂಡ ಖರೀದಿ ಮಾಡಿದೆ. ಇಷ್ಟೊಂದು ಬೃಹತ್ ಮೊತ್ತ ನೀಡಿ ಯಾವುದೇ ತಂಡ ಆಟಗಾರನನ್ನು ಖರೀದಿಸಿಲ್ಲ.ಅದರಲ್ಲಿಯೂ 30 ವರ್ಷ ದಾಟಿದ ಆಟಗಾರರನ್ನು ಯಾವುದೇ ತಂಡ ಇಷ್ಟೊಂದು ಮೊತ್ತ ನೀಡಿ ಖರೀದಿಸುವುದಿಲ್ಲ. ಈಗ ರೊನಾಲ್ಡೊ ವಯಸ್ಸು 33!

ಅಂದಾಜು ₹242 ಕೋಟಿ ವಾರ್ಷಿಕ ಸಂಬಳಕ್ಕೆ ನಾಲ್ಕು ವರ್ಷದ ಗುತ್ತಿಗೆ ಇದು ಎಂದು ಸ್ಪಾನಿಶ್ ಮ್ಯಾಧ್ಯಮಗಳು ವರದಿ ಮಾಡಿವೆ. ಕಳೆದ ಏಳು ಆವೃತ್ತಿಗಳಲ್ಲಿ ಯುವೆಂಟಸ್ ತಂಡ ಇಟಾಲಿಯನ್ ಸಿರಿ ಎ ಚಾಂಪಿಯನ್‍ ಆಗಿ ಹೊರಹೊಮ್ಮಿತ್ತು.

ಕಳೆದ ಆವೃತ್ತಿಯಲ್ಲಿ UEFA ಚಾಂಪಿಯನ್ಸ್ ಲೀಗ್ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಯುವೆಂಟಸ್ ತಂಡದ ವಿರುದ್ಧ ಕ್ರಿಸ್ಟಿಯಾನೊ ಬೈಸಿಕಲ್ ಕಿಕ್ ಹೊಡೆದಿದ್ದರು.ಈ ಪಂದ್ಯದಲ್ಲಿ ರಿಯಲ್ ಮ್ಯಾಡ್ರಿಡ್ ತಂಡ 3-0 ಅಂತರದಿಂದ ಗೆಲುವು ಸಾಧಿಸಿತ್ತು.

2009ರಲ್ಲಿ ಮ್ಯಾಂಚೆಸ್ಟರ್ ಯುನೈಟೆಡ್ ತಂಡದಿಂದ ರಿಯಲ್ ಮ್ಯಾಂಡ್ರಿಡ್ ತಂಡಕ್ಕೆ ಬಂದಾಗ ಕ್ರಿಸ್ಟಿಯಾನೊ ಬೆಲೆ 99 ಮಿಲಿಯನ್ ಯೂರೊ ಆಗಿತ್ತು.9 ವರ್ಷಗಳ ನಂತರ ಈ ಪೋರ್ಚುಗೀಸ್ ಆಟಗಾರನ ಮೌಲ್ಯದಲ್ಲಿ 11 ಮಿಲಿಯನ್ ಯುರೊ ಏರಿಕೆ ಉಂಟಾಗಿದೆ.