ರಾಷ್ಟ್ರೀಯ ಮಹಿಳಾ ಫುಟ್‌ಬಾಲ್‌ ಲೀಗ್‌: ಗೋಕುಲಂ ಕೇರಳ ಚಾಂಪಿಯನ್‌
ಫೈನಲ್‌ನಲ್ಲಿ ಕ್ರಿಪ್ಶಾ ತಂಡಕ್ಕೆ ನಿರಾಸೆ
ಬೆಂಗಳೂರು: ಜಿದ್ದಾಜಿದ್ದಿ ಪೈಪೋಟಿ ಕಂಡ ಫೈನಲ್‌ ಹಣಾಹಣಿಯಲ್ಲಿ ಗೋಕುಲಂ ಕೇರಳ ತಂಡ, ಕಂಚುಪ್‌ ರೋಡ್‌ ಯಂಗ್‌ ಫಿಸಿಕಲ್‌ ಆ್ಯಂಡ್‌ ಸ್ಪೋರ್ಟ್ಸ್ (ಕ್ರಿಪ್ಶಾ ಎಫ್‌ಸಿ) ತಂಡವನ್ನು 3–2ರಿಂದ ಮಣಿಸಿತು. ಇದರೊಂದಿಗೆ ರಾಷ್ಟ್ರೀಯ ಮಹಿಳಾ ಲೀಗ್‌ ಫುಟ್‌ಬಾಲ್‌ ಟೂರ್ನಿಯಲ್ಲಿ ಶುಕ್ರವಾರ ನೂತನ ಚಾಂಪಿಯನ್‌ ಆಗಿ ಹೊರಹೊಮ್ಮಿತು.
ರಾಜ್ಯ ಫುಟ್‌ಬಾಲ್‌ ಸಂಸ್ಥೆಯ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಇರೋಮ್‌ ಪ್ರಮೇಶ್ವರಿ ದೇವಿ (1ನೇ ನಿಮಿಷ) ಹಾಗೂ ಕಮಲಾ ದೇವಿ (25ನೇ ನಿಮಿಷ) ಗೋಲು ಕಾಲ್ಚಳಕ ತೋರುವ ಮೂಲಕ ಗೋಕುಲಂ ಕೇರಳ ತಂಡಕ್ಕೆ ಆರಂಭದಲ್ಲೇ ಮುನ್ನಡೆ ಒದಗಿಸಿದರು.
ಆದರೆ ಡಂಗ್ಮೆ ಗ್ರೇಸ್‌ (34ನೇ ನಿಮಿಷ) ಹಾಗೂ ರತನ್‌ ಬಾಲಾದೇವಿ (72ನೇ ನಿಮಿಷ) ಗೋಲು ದಾಖಲಿಸಿ ಸಮಬಲ ಸಾಧಿಸಿದರು. ಕೇರಳ ತಂಡದ ಸಬಿತ್ರಾ ಭಂಡಾರಿ ಪಂದ್ಯದ ಕೊನೆಯ ಹಂತದಲ್ಲಿ (87ನೇ ನಿಮಿಷ) ಗೋಲು ಹೊಡೆದು ತಂಡದ ಗೆಲುವಿನ ಸಂಭ್ರಮಕ್ಕೆ ಕಾರಣವಾದರು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.