ಹಾಕಿ ಇಂಡಿಯಾ ವಿಶೇಷ ಅಧಿವೇಶನ 13ಕ್ಕೆ
ಒಲಿಂಪಿಕ್ಸ್‌ ಸಿದ್ಧತೆ, ಸಂಸ್ಥೆಯ ನಿಯಮಾವಳಿಗೆ ತಿದ್ದುಪಡಿ ಚರ್ಚೆ
ನವದೆಹಲಿ: ಹಾಕಿ ಇಂಡಿಯಾ ಇದೇ ತಿಂಗಳ 13ರಂದು ಆನ್‌ಲೈನ್‌ ಮೂಲಕ ವಿಶೇಷ ಅಧಿವೇಶನವನ್ನು ಕರೆಯಲಿದೆ. ಇದರಲ್ಲಿ ಟೋಕಿಯೊ ಒಲಿಂಪಿಕ್ಸ್‌ಗೆ ಪುರುಷರ ಮತ್ತು ಮಹಿಳಾ ತಂಡಗಳ ಸಿದ್ಧತೆಯ ಸ್ಥಿತಿಗತಿ, ಕೋವಿಡ್‌–19 ಪಿಡುಗಿನ ನಂತರ ಆಟದ ಪುನರಾರಂಭದ ಬಗ್ಗೆ ಚರ್ಚೆಯಾಗಲಿದೆ.
ಭಾರತ ಒಲಿಂ‍ಪಿಕ್ ಸಂಸ್ಥೆ ಅಧ್ಯಕ್ಷ ಮತ್ತು ಅಂತರರಾಷ್ಟ್ರೀಯ ಹಾಕಿ ಫೆಡರೇಷನ್‌ (ಐಎಚ್‌ಎಫ್‌) ಮುಖ್ಯಸ್ಥ ನರಿಂದರ್‌ ಬಾತ್ರಾ ಅವರು ಈ ಅಧಿವೇಶನಕ್ಕೆ ವಿಶೇಷ ಆಹ್ವಾನಿತರಾಗಿದ್ದಾರ ಎಂದು ಹಾಕಿ ಇಂಡಿಯಾದ ಸುತ್ತೋಲೆ ಗುರುವಾರ ತಿಳಿಸಿದೆ.
ಕೊರೊನಾ ವೈರಸ್‌ ಉಪಟಳದ ಕಾರಣ ಅಧಿವೇಶನವನ್ನು ಆನ್‌ಲೈನ್‌ನಲ್ಲಿ ನಡೆಸಲಾಗುತ್ತಿದೆ.
ಈ ವರ್ಷದ ರಾಷ್ಟ್ರೀಯ ಹಾಕಿ ಚಾಂಪಿಯನ್‌ಷಿಪ್‌ ಸ್ಥಿತಿಗತಿಯೂ ಚರ್ಚೆಗೆ ಬರಲಿದೆ. ರಾಜ್ಯಗಳ ಚಾಂಪಿಯನ್‌ಷಿಪ್‌ ಜೊತೆಗೆ ಮುಂದಿನ ವರ್ಷ ಜಾರಿಯಾಗಲಿರುವ ದೇಶಿಯ ಟೂರ್ನಿಗಳ ಹೊಸ ಸ್ವರೂಪದ ಬಗ್ಗೆಯೂ ಚರ್ಚೆ ಆಗಲಿದೆ.
ಕೋವಿಡ್‌ ನಂತರದ ದಿನಗಳಲ್ಲಿ ಕ್ರೀಡಾ ಚಟುವಟಿಕೆಯ ಪುನರಾರಂಭದ ಬಗ್ಗೆ ಐಒಎ ನಡೆಸಿರುವ ಸಮೀಕ್ಷೆಯಲ್ಲಿ ವ್ಯಕ್ತವಾಗುವ ಅಂಶಗಳ ಬಗ್ಗೆಯೂ ಈ ಅಧಿವೇಶನದಲ್ಲಿ ಪ್ರಸ್ತಾಪವಾಗಲಿದೆ.
ಹಾಕಿ ಇಂಡಿಯಾ ನಿಯಮಾವಳಿಗೆ ಉದ್ದೇಶಿತ ತಿದ್ದುಪಡಿ, ಹಾಕಿ ಇಂಡಿಯಾದ ಸಿಇಒ ವಾರ್ಷಿಕ ವರದಿಯ ವಿಷಯವೂ ಪರಿಗಣನೆಗೆ ಬರಲಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.