ವೇಟ್‌ ಲಿಫ್ಟಿಂಗ್‌: 18ರಂದು ತಾಷ್ಕೆಂಟ್‌ಗೆ ಜೆರೆಮಿ, ಅಚಿಂತ
ವಿಶ್ವ ಜೂನಿಯರ್ ಚಾಂಪಿಯನ್‌ಷಿಪ್‌ನಲ್ಲಿ ಭಾಗವಹಿಸಲಿರುವ ಭಾರತದ ಸ್ಪರ್ಧಿಗಳು
ನವದೆಹಲಿ: ಯೂತ್ ಒಲಿಂಪಿಕ್ಸ್ ಚಿನ್ನದ ಪದಕ ವಿಜೇತ, ಭಾರತದ ಜೆರೆಮಿ ಲಾಲ್‌ರಿನ್ನುಂಗಾ ಮತ್ತು ಅಚಿಂತ ಶೆವುಲಿ ಅವರು ವಿಶ್ವ ಜೂನಿಯರ್ ಚಾಂಪಿಯನ್‌ಷಿಪ್‌ನಲ್ಲಿ ಭಾಗವಹಿಸಲು ಮಂಗಳವಾರ ಉಜ್ಬೆಕಿಸ್ತಾನದ ತಾಷ್ಕೆಂಟ್‌ಗೆ ತೆರಳುವರು. ಮೇ 23ರಿಂದ 31ರವರೆಗೆ ಈ ಚಾಂಪಿಯನ್‌ಷಿಪ್ ನಡೆಯಲಿದೆ.
ಜೆರೆಮಿ (67 ಕೆಜಿ ವಿಭಾಗ) ಹಾಗೂ ಅಚಿಂತ (73 ಕೆಜಿ) ಅವರ ಪ್ರಯಾಣಕ್ಕೆ ವ್ಯವಸ್ಥೆ ಮಾಡಿರುವುದನ್ನು ಭಾರತ ವೇಟ್‌ಲಿಫ್ಟಿಂಗ್ ಫೆಡರೇಷನ್‌ (ಐಡಬ್ಲ್ಯುಎಲ್‌ಎಫ್‌) ಖಚಿತಪಡಿಸಿದೆ.
‘ಇಬ್ಬರು ಸ್ಪರ್ಧಿಗಳ ವಿಮಾನದ ಟಿಕೆಟ್‌ಗಳನ್ನು ಕಾಯ್ದಿರಿಸಲಾಗಿದೆ. ಇದೇ 18ರ ಬೆಳಿಗ್ಗೆ ಅವರು ಪ್ರಯಾಣ ಬೆಳೆಸುವರು‘ ಎಂದು ಐಡಬ್ಲ್ಯುಎಲ್‌ಎಫ್‌ ಕಾರ್ಯದರ್ಶಿ ಸಹದೇವ್ ಯಾದವ್ ತಿಳಿಸಿದ್ದಾರೆ.
‘ಉಜ್ಬೆಕಿಸ್ತಾನದಲ್ಲಿ ಕ್ವಾರಂಟೈನ್‌ ಇಲ್ಲ. ಕೋವಿಡ್‌ ‘ನೆಗೆಟಿವ್‌‘ ವರದಿ ಸಲ್ಲಿಸಿದರೆ ಸಾಕು‘ ಎಂದು ಯಾದವ್ ನುಡಿದರು.
ಮುಖ್ಯ ಕೋಚ್‌ ವಿಜಯ್ ಶರ್ಮಾ ಅನುಪಸ್ಥಿತಿಯಲ್ಲಿ, ಕೋಚ್‌ಗಳಾದ ಪ್ರಮೋದ್ ಶರ್ಮಾ ಮತ್ತು ವಿಜಯ್ ರೋಹಿಲ್ಲಾ ಅವರು ಈ ವೇಟ್‌ಲಿಫ್ಟರ್‌ಗಳ ಜೊತೆ ತೆರಳಲಿದ್ದಾರೆ. ವಿಜಯ್ ಅವರು, ಅಮೆರಿಕದಲ್ಲಿ ತರಬೇತಿ ಪಡೆಯುತ್ತಿರುವ ಮೀರಾಬಾಯಿ ಚಾನು ಅವರ ಜೊತೆಯಲ್ಲಿದ್ದಾರೆ. ಮೀರಾಬಾಯಿ ಒಲಿಂಪಿಕ್ಸ್‌ಗೆ ಅರ್ಹತೆ ಗಿಟ್ಟಿಸಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.