ಈಜು ಚಾಂಪಿಯನ್‌ಷಿಪ್ | ವಾಟರ್ ಪೋಲೊ ಸ್ಪರ್ಧೆ: ಕರ್ನಾಟಕ ತಂಡಗಳಿಗೆ ಹ್ಯಾಟ್ರಿಕ್ ಜಯ

ಬೆಂಗಳೂರು: ಚಿನ್ಮಯಿ ಪೈ ಅವರ ಅಮೋಘ ಆಟದ ನೆರವಿನಿಂದ ಕರ್ನಾಟಕದ ಬಾಲಕರ ತಂಡವು 51ನೇ ಜೂನಿಯರ್ ರಾಷ್ಟ್ರೀಯ ಈಜು ಚಾಂಪಿಯನ್‌ಷಿಪ್‌ನ ವಾಟರ್‌ ಪೋಲೊ ಸ್ಪರ್ಧೆಯಲ್ಲಿ ಹ್ಯಾಟ್ರಿಕ್‌ ಜಯ ಸಾಧಿಸಿತು.

ಬಸವನಗುಡಿ ಈಜು ಕೇಂದ್ರದಲ್ಲಿ ಬುಧವಾರ ನಡೆದ ಪಂದ್ಯದಲ್ಲಿ ಕರ್ನಾಟಕ 15–5ರಿಂದ ಒಡಿಶಾ ತಂಡವನ್ನು ಮಣಿಸಿತು. ಆತಿಥೇಯ ತಂಡದ ಪರ ಚಿನ್ಮಯಿ 7 ಅಂಕ ಗಳಿಸಿದರೆ, ಸೂರ್ಯಚಂದ್ರ 3 ಅಂಕ ಕಲೆಹಾಕಿದರು. ಇದಕ್ಕೂ ಮುನ್ನ ಕರ್ನಾಟಕ ತಂಡವು 13–3ರಿಂದ ಮಣಿಪುರ ವಿರುದ್ಧ; 12–2ರಿಂದ ಹರಿಯಾಣ ವಿರುದ್ಧ ಗೆಲುವು ಸಾಧಿಸಿತ್ತು.

ಕರ್ನಾಟಕದ ಬಾಲಕಿಯರೂ ಸತತ ಮೂರನೇ ಪಂದ್ಯವನ್ನು ಗೆದ್ದುಕೊಂಡರು. ಮೂರನೇ ಪಂದ್ಯದಲ್ಲಿ ಸಾಂಘಿಕ ಪ್ರದರ್ಶನ ನೀಡಿ 7–6ರಿಂದ ಮಹಾರಾಷ್ಟ್ರ ತಂಡವನ್ನು ಮಣಿಸಿದರು. ಇಶಾನಿ ಕಿರಣ್‌, ರೋಷಿಣಿ ಎಸ್. ಮತ್ತು ತನ್ವಿ ರವಿ ತಲಾ ಎರಡು ಅಂಕ ಗಳಿಸಿದರು. ಇದಕ್ಕೂ ಮುನ್ನ ಕರ್ನಾಟಕ 8–1ರಿಂದ ತಮಿಳುನಾಡು ವಿರುದ್ಧ; 9–0ರಿಂದ ಅಸ್ಸಾಂ ವಿರುದ್ಧ ಗೆಲುವು ಸಾಧಿಸಿತ್ತು.

ಬಾಲಕರ ವಿಭಾಗದ ಇತರ ಪಂದ್ಯಗಳಲ್ಲಿ ಮಹಾರಾಷ್ಟ್ರ 17–1ರಿಂದ ದೆಹಲಿ ವಿರುದ್ಧ; ಬಂಗಾಳ 14–ರಿಂದ ಅಸ್ಸಾಂ ವಿರುದ್ಧ; ಕೇರಳ 8–2ರಿಂದ ತೆಲಂಗಾಣ ವಿರುದ್ಧ; ಹರಿಯಾಣ 8–1ರಿಂದ ಮಣಿಪುರ ವಿರುದ್ಧ ಗೆಲುವು ಸಾಧಿಸಿದವು. ಬಾಲಕಿಯರ ವಿಭಾಗದಲ್ಲಿ ತಮಿಳುನಾಡು 9–4ರಿಂದ ಅಸ್ಸಾಂ ಎದುರು; ಕೇರಳ 15–2ರಿಂದ ಬಂಗಾಳ ಎದುರು ಜಯ ಸಾಧಿಸಿದವು. 

ಮಹಾರಾಷ್ಟ್ರ ಪ್ರಾಬಲ್ಯ: ಕೆನ್ಸಿಂಗ್ಟನ್ ಈಜುಕೊಳದಲ್ಲಿ ನಡೆಯುತ್ತಿರುವ ಡೈವಿಂಗ್‌ ಸ್ಪರ್ಧೆಯಲ್ಲಿ ಬುಧವಾರ ಮಹಾರಾಷ್ಟ್ರದ ಈಜುಪಟುಗಳು ಎರಡು ಚಿನ್ನ ಗೆದ್ದು ಪ್ರಾಬಲ್ಯ ಮೆರೆದರು. ಎಸ್‌ಎಸ್‌ಸಿಬಿ ಮತ್ತು ತಮಿಳುನಾಡು ತಲಾ ಒಂದು ಚಿನ್ನ ಗೆದ್ದುಕೊಂಡಿತು.

ಡೈವಿಂಗ್‌ ಫಲಿತಾಂಶ

ಬಾಲಕರು

• ಜಿ–1 3ಎಂಟಿ ಎಸ್‌ಬಿ: ಸೌಮಿಕ್ ಪೊಲ್ಲಿ (ಎಸ್‌ಎಸ್‌ಸಿಬಿ, 400.60 ಅಂಕ)–1, ಸುಪ್ರದೀಪ್‌ ಸಾಹ (ಎಸ್‌ಎಸ್‌ಸಿಬಿ)–2, ಸ್ವರಾಜ್‌ ರಾಜೇಂದ್ರ ಲಾಡ್‌ (ಮಹಾರಾಷ್ಟ್ರ)–3.

• ಜಿ–3 ಪ್ಲಾಟ್‌ಫಾರಂ: ಇಂದ್ರಾನಿಲ್ ದಿಗ್ವಿಜಯ್ ಪಾಟೀಲ್ (ಮಹಾರಾಷ್ಟ್ರ, 218.85 ಅಂಕ)–1, ಅರುಬಮ್ ಬೆನ್ಹರ್ (ಮಣಿಪುರ)–2, ಹಿರೋಮ್ ಬೋನ್ಸನ್ ಸಿಂಗ್ (ಮಣಿಪುರ)–3. 

ಬಾಲಕಿಯರು

• ಜಿ–1 ಪ್ಲಾಟ್‌ಫಾರಂ: ರಾವಣಿ ಪ್ರತಾಪ್ ಸೂರ್ಯವಂಶಿ (ಮಹಾರಾಷ್ಟ್ರ, 288.05 ಅಂಕ)–1, ಕೆಯಾ ಹೆರಾಂಬ್ ಪ್ರಭು (ಮಹಾರಾಷ್ಟ್ರ)–2, ಪ್ರೀತಿ ಶರ್ಮಾ–3.

• ಜಿ–22 1ಎಂಟಿ ಎಸ್‌ಬಿ: ಶಿವಶ್ಮಿ ಎಸ್.ಎಂ. (ತಮಿಳುನಾಡು, 226.35 ಅಂಕ)–1, ಅನನ್ಯಾ ಯಾದವ್‌ (ಮಧ್ಯಪ್ರದೇಶ)–2, ವಂಶಿಕಾ ಎಸ್‌.ಸಿ (ಮಹಾರಾಷ್ಟ್ರ)–3.