ಇಂಡಿಯಾ ಓಪನ್‌ ಟೂರ್ನಿಯಿಂದ ಹೊರಬಿದ್ದ ಲಕ್ಷ್ಯ ಸೇನ್

ನವದೆಹಲಿ: ವಿಶ್ವದ 12ನೇ ಕ್ರಮಾಂಕದ ಆಟಗಾರ ಲಿನ್‌ ಚುನ್‌–ಯಿ ಎದುರು ಭಾರತದ ಲಕ್ಷ್ಯ ಸೇನ್ ತೀವ್ರ ಹೋರಾಟ ಪ್ರದರ್ಶಿಸಿದರೂ, ಮೂರು ಗೇಮ್‌ಗಳ ಪಂದ್ಯದ ನಿರ್ಣಾಯಕ ಹಂತದಲ್ಲಿ ಎಡವಿದರು. ಶುಕ್ರವಾರ ನಡೆದ ಕ್ವಾರ್ಟರ್‌ಫೈನಲ್‌ನಲ್ಲಿ ಅವರು ಸೋಲುವುದರೊಂದಿಗೆ ಇಂಡಿಯಾ ಓಪನ್ ಸೂಪರ್ 750 ಟೂರ್ನಿಯಲ್ಲಿ ಭಾರತದ ಸವಾಲು ಅಂತ್ಯಗೊಂಡಿತು.

ಉತ್ತರಾಖಂಡದ ಅಲ್ಮೋರಾದ 24 ವರ್ಷ ವಯಸ್ಸಿನ ಆಟಗಾರ 21–17, 13–21, 18–21 ರಲ್ಲಿ ತೈವಾನ್‌ನ ಲಿನ್‌ ಚುನ್ ಅವರಿಗೆ ಮಣಿದರು. ತೀವ್ರ ಹಣಾಹಣಿಯ ಪಂದ್ಯದಲ್ಲಿ ಇಬ್ಬರೂ ಅತ್ಯುತ್ತಮ ಮಟ್ಟದಲ್ಲಿ ಆಡಿದರು.

ದೀರ್ಘ ರ್‍ಯಾಲಿಗಳು, ನೆಟ್‌ ಬಳಿ ಕೌಶಲದ ಹೊಡೆತಗಳು ಕಾಣಸಿಕ್ಕಿದವು. ಮೂರು ಗೇಮ್‌ಗಳ ದೀರ್ಘ ಪಂದ್ಯದಲ್ಲಿ ಇಬ್ಬರೂ ಪರಸ್ಪರರ ಸಂಯಮ ಪರೀಕ್ಷಿಸಿದರು.