ದಾಖಲೆ ಬರೆದ ತಜಿಂದರ್‌ಗೆ ಒಲಿಂಪಿಕ್ಸ್‌ ಟಿಕೆಟ್‌

ಪಟಿಯಾಲ: ಶಾಟ್‌ಪಟ್‌ನಲ್ಲಿ ರಾಷ್ಟ್ರೀಯ ದಾಖಲೆ ಬರೆದ ತಜಿಂದರ್ ಸಿಂಗ್ ತೂರ್ ಅವರು ಟೋಕಿಯೊ ಒಲಿಂಪಿಕ್ಸ್‌ಗೆ ಅರ್ಹತೆ ಗಳಿಸಿದರು. ಇಲ್ಲಿ ಸೋಮವಾರ ಆರಂಭಗೊಂಡ ಇಂಡಿಯನ್ ಗ್ರ್ಯಾನ್‌ ಪ್ರಿ ನಾಲ್ಕರಲ್ಲಿ ತೂರ್‌ 21.49 ಮೀಟರ್‌ಗಳ ಸಾಧನೆ ಮಾಡಿದರು. ಈ ಮೂಲಕ ತಮ್ಮದೇ ಹೆಸರಿನಲ್ಲಿದ್ದ ದಾಖಲೆಯನ್ನು (20.92 ಮೀ; 2019) ಮುರಿದರು. ಒಲಿಂಪಿಕ್ಸ್‌ ಅರ್ಹತೆಗೆ 21.10 ಮೀಟರ್ಸ್‌ ನಿಗದಿ ಮಾಡಲಾಗಿತ್ತು.

ಮಹಿಳೆಯರ ರಿಲೆ ತಂಡ 43.37 ಸೆಕೆಂಡುಗಳ ಸಾಧನೆಯೊಂದಿಗೆ ದಾಖಲೆ ಬರೆಯಿತು. ಆದರೆ ಒಲಿಂಪಿಕ್ಸ್‌ಗೆ ಅರ್ಹತೆ ಗಳಿಸಲು ವಿಫಲವಾಯಿತು. ಹಿಮಾ ದಾಸ್‌, ದ್ಯುತಿ ಚಾಂದ್‌, ಎಸ್‌.ಧನಲಕ್ಷ್ಮಿ ಮತ್ತು ಅರ್ಚನಾ ಸುಶೀಂದ್ರನ್ ಅವರನ್ನು ಒಳಗೊಂಡ ತಂಡ ಭಾರತ ‘ಬಿ’ ತಂಡವನ್ನು (48.2 ಸೆಕೆಂಡು) ಸೋಲಿಸಿ ಮೆರ್ಲಿನ್ ಜೋಸೆಫ್‌, ಎಚ್‌.ಎಂ.ಜ್ಯೋತಿ, ಶ್ರಬನಿ ನಂದಾ ಮತ್ತು ದ್ಯುತಿ 2016ರಲ್ಲಿ ಮಾಡಿದ ದಾಖಲೆಯನ್ನು (43.42 ಸೆ) ಹಿಂದಿಕ್ಕಿತು. ಮಾಲ್ಡಿವ್ಸ್‌ ಮೂರನೇ ಸ್ಥಾನ ಗಳಿಸಿತು.

ಸ್ಪ್ರಿಂಟರ್ ದ್ಯುತಿ ಚಾಂದ್ 100 ಮೀಟರ್ಸ್ ಓಟದಲ್ಲಿ ದಾಖಲೆ ಮಾಡಿದರು. 11.17 ಸೆಕೆಂಡುಗಳಲ್ಲಿ ಗುರಿ ಮುಟ್ಟಿದ ಅವರು ತಮ್ಮದೇ ಹೆಸರಿನಲ್ಲಿದ್ದ (11.21 ಸೆ) ದಾಖಲೆ ಮುರಿದರು. ಮಹಿಳೆಯರ ಡಿಸ್ಕಸ್ ಥ್ರೋದಲ್ಲಿ ಕಮಲ್‌ಪ್ರೀತ್ ಕೌರ್ 66.59 ಮೀಟರ್ಸ್ ದೂರ ಎಸೆದು ತಮ್ಮದೇ ಹೆಸರಿನಲ್ಲಿದ್ದ ದಾಖಲೆಯನ್ನು ಮುರಿದರು.