ವಿಶ್ವ ಚಾಂಪಿಯನ್‌ಷಿಪ್ 1500 ಮೀ. ಓಟ: ಐಸಾಕ್‌ಗೆ ಅಚ್ಚರಿಯ ಚಿನ್ನ

ಟೋಕಿಯೊ: ಅಂತಿಮ ಕ್ಷಣಗಳಲ್ಲಿ ಅಮೋಘವಾಗಿ ಓಡಿದ ಪೋರ್ಚುಗಲ್‌ನ ಐಸಾಕ್ ನಾಡೆರ್‌, ಬ್ರಿಸ್ಟನ್ ಜೇಕ್‌ ವೈಟ್‌ಮನ್ ಅವರನ್ನು ಕೂದಲೆಳೆ ಅಂತರದಲ್ಲಿ ಹಿಂದೆಹಾಕಿ ವಿಶ್ವ ಚಾಂಪಿಯನ್‌ಷಿಪ್‌ನ ಪುರುಷರ 1500 ಮೀ. ಓಟದಲ್ಲಿ ಅಚ್ಚರಿಯ ರೀತಿ ಚಿನ್ನ ಗೆದ್ದುಕೊಂಡರು.

ಬುಧವಾರ ನಡೆದ ಈ ಓಟದಲ್ಲಿ ಐಸಾಕ್ 3ನಿ.34.10 ಸೆ.ಗಳಲ್ಲಿ ಗುರಿತಲುಪಿದ ಐಸಾಕ್‌, 2022ರ ವಿಶ್ವ ಚಾಂಪಿಯನ್‌ ಓಟಗಾರರನ್ನು ಸೆಕೆಂಡಿನ 200ನೇ ಒಂದು ಭಾಗದಿಂದ ಹಿಂದೆಹಾಕಿದರು.

ಕೇಟಿ ಮೂನ್‌ಗೆ ಚಿನ್ನ: ಅಮೆರಿಕದ ಕ್ಯಾಥಿ ಮೂನ್ ಮಹಿಳೆಯರ ವಿಭಾಗದ ಪೋಲ್‌ವಾಲ್ಟ್‌ನಲ್ಲಿ ಸತತ ಮೂರನೇ ಬಾರಿ ಚಿನ್ನ ಗೆದ್ದರು. 2021ರ ಒಲಿಂಪಿಕ್ ಚಾಂಪಿಯನ್ ಸಹ ಆಗಿರುವ ಅವರು 4.90 ಮೀ. ಎತ್ತರ ಜಿಗಿದರು. ಇದೇ ದೇಶದ ಸಾಂಡಿ ಮಾರಿಸ್ (4.85 ಮೀ.) ಬೆಳ್ಳಿ ಗೆದ್ದರು. ಕಂಚಿನ ಪದಕ ಸ್ಲೊವೇನಿಯಾದ ಟೀನಾ ಸುಟೆಜ್ (4.80 ಮೀ) ಪಾಲಾಯಿತು. ಹಾಲಿ ಒಲಿಂಪಿಕ್ ಚಾಂಪಿಯನ್ ನೀನಾ ಕೆನಡಿ (ಆಸ್ಟ್ರೇಲಿಯಾ) ಅವರು ಕಾಲಿನ ಸ್ನಾಯು ಸಮಸ್ಯೆಯ ಕಾರಣ ಇಲ್ಲಿಗೆ ಬಂದಿರಲಿಲ್ಲ.